Монгол Улсын 2026 оны төсвийг УИХ-д өргөн мэдүүлэхээр болов

Засгийн газар өнөөдөр Монгол Улсын 2026 оны төсөвтэй холбоотой багц хуулийн төслүүдийг хэлэлцэж, Улсын Их Хуралд өргөн мэдүүлэхээр шийдвэрлэв.

Энэ хүрээнд дараах төсвийн тухай хуулийн төслүүдийг боловсруулжээ:

• Монгол Улсын 2026 оны төсөв
• Үндэсний баялгийн сангийн 2026 оны төсөв
• Нийгмийн даатгалын сангийн 2026 оны төсөв
• Эрүүл мэндийн даатгалын сангийн 2026 оны төсөв

Мөн эдгээртэй уялдан боловсруулсан бусад хууль тогтоомжийн төслүүдийг багтаасан байна.

Үүнээс гадна, Монгол Улсын нэгдсэн төсвийн 2026 оны хүрээний мэдэгдэл, 2027-2028 оны төсвийн төсөөллийн тухай хуульд нэмэлт өөрчлөлт оруулах төслийг Засгийн газар хэлэлцэж, УИХ-ын чуулганы хуралдааны дэгийн тухай хуульд заасны дагуу яаралтай хэлэлцүүлэхээр УИХ-д өргөн барихаар тогтов.