Бүгд Найрамдах Өмнөд Судан Улсад зохион байгуулагдсан НҮБ-ын “UNMISS” ажиллагааны хүрээн дэх “Norcon march” марш тэмцээн монгол цэргүүдийн ялалтаар өндөрлөв. Энэхүү тэмцээн нь энхийг сахиулагчдын тэсвэр хатуужлыг шалгахын зэрэгцээ тэдний нөхөрлөл, хамтын ажиллагааг бэхжүүлэх зорилготой бөгөөд оролцогчид 10 кг ачаатайгаар 25 км замыг туулдаг онцлогтой юм.
Тэмцээнд 50 орчим орны 300 гаруй цэргийн алба хаагч өрсөлдсөнөөс Монголын дайчид дөрвөн төрлийн гуравт нь тэргүүн байр эзэллээ:
- -40 насны эрэгтэй төрөл: Дэд ахлагч М.Сауыржан (1-р мото буудлагын рот) алтан медаль хүртэв.
- -40 насны эмэгтэй төрөл: Дэд ахлагч О.Уранбайгаль (Хангалт үйлчилгээний рот) тэргүүн байрт шалгарлаа.
- +40 насны эмэгтэй төрөл: Ахлах ахлагч Б.Болормаа (Цэргийн цагдаагийн тасаг) аваргаллаа.
- Хүрэл медаль: -40 насны эрэгтэй төрөлд дэд ахлагч Б.Жансерик гуравдугаар байрт шалгарч, амжилтаа бататгав.
Өнгөрсөн хоёр жилийн хугацаанд Энэтхэг болон БНХАУ-ын цэргүүд тус тэмцээнд дараалан түрүүлээд байсан бол энэ жил Монгол Улсын Зэвсэгт хүчний алба хаагчид ийнхүү гурван төрөлд тэргүүлж, олон улсын тавцанд нэр хүндээ дахин баталгаажууллаа. Энэхүү ялалт нь Монголын энхийг сахиулагчдын бие бялдар, сахилга бат, тэсвэр хатуужил дэлхийн түвшинд байгааг илтгэн харуулсан чухал үйл явдал болов.
