Монгол Улсад мэс заслын салбарын хөгжил шинэ шатанд гарч, Улсын Нэгдүгээр Төв Эмнэлэг (УНТЭ)-ийн эмч нар амны хүрцээр бамбай булчирхайн зангилаа авах дурангийн мэс заслыг анх удаа амжилттай хийжээ.
Энэхүү мэс заслыг дотоод шүүрлийн мэс заслын багийн ахлагч, эмч М.Баярмагнай удирдан гүйцэтгэсэн бөгөөд дэлхийд өргөн хэрэглэгдэж буй хамгийн орчин үеийн арга болох TOETVA (Transoral Endoscopic Thyroidectomy Vestibular Approach) технологийг Монголд анх удаа нэвтрүүлээд байна. Тус баг одоогоор хоёр өвчтөнд уг мэс заслыг амжилттай хийж, эерэг үр дүн үзүүлжээ.
TOETVA нь арьсан дээр ямар ч зүслэг хийхгүйгээр, амны хөндийгөөр дамжин дурангийн аргаар мэс заслыг гүйцэтгэдэг дэвшилтэт технологи бөгөөд олон улсад гоо сайхны хувьд хамгийн тохиромжтой, өвдөлт багатай, эдгэрэлт хурдан, сорвигүй шийдэл гэдгээрээ үнэлэгддэг.
Эрүүл Мэндийн Яам-наас мэдээлснээр, энэхүү технологи Монголд нэвтэрснээр эмчилгээний чанар, өвчтөний тав тух, гоо сайхны үр дүн зэрэг олон талын дэвшлийг авчирч байгаа нь эмнэлгийн тусламж үйлчилгээний шинэ хуудас болж байна.
