Мьянмарын төвийн бүс нутагт өнгөрсөн баасан гарагт тохиосон 7.7 магнитудын хүчтэй газар хөдлөлт аймшигт хохирол дагуулж, өнөөдрийн байдлаар 3003 хүн амиа алдсан болохыг эрх баригчид мэдээллээ. Байгалийн энэхүү гамшгийн улмаас 4515 хүн гэмтэж, 351 хүн сураггүй алга болоод байгаа аж.
Цэргийн хунтын дэглэм энэхүү гамшгийн улмаас хохирол амссан иргэдэд тусламж үзүүлэх, сэргээн босгох ажиллагааг хөнгөвчлөх үүднээс 2025 оны дөрөвдүгээр сарын 22 хүртэл дайны ажиллагаагаа түр зогсоох шийдвэр гаргасан тухай төрийн мэдлийн телевизээр мэдээлжээ. Гал зогсоох энэ шийдвэр нь ардчиллыг дэмжигч хүчнүүд болон үндэстний цөөнхүүдийн эсрэг явуулж буй зэвсэгт ажиллагааг түр хугацаанд зогсоох юм.
Мьянмарын Үндэсний эв нэгдлийн засгийн газар мөн адил хоёр долоо хоногийн хугацаанд гал зогсоохоо мэдэгдсэн байна.
Мөн энэ долоо хоногт Мьянмарын цэргийн удирдагч Мин Аун Хлайн Тайландын нийслэл Бангкокт болох бүс нутгийн удирдагчдын уулзалтад оролцохоор төлөвлөж байгаа бөгөөд тэндээс олон улсын тусламж дэмжлэг хүсэх зорилготой байгааг эх сурвалжууд онцолжээ. Гэхдээ 2021 онд цэргийн эргэлт гарснаас хойш барууны хориг арга хэмжээнд өртөөд буй Мьянмар улс олон улсын хамтын нийгэмлэгээс улам бүр тусгаарлагдсан байгаа нь шаардлагатай тусламжийг цаг алдалгүй авах эсэхэд эргэлзээ төрүүлж байна.
