Засгийн газрын өнөөдрийн хуралдаанаар стратегийн ач холбогдолтой 39 ордын талаарх дүгнэлтийг танилцуулжээ. Үүнд УИХ-ын гишүүн Н.Учрал Үндэсний баялгийн сангийн тухай хуулийг хэрэгжүүлэх ажлын хэсгийг ахалж буй хүний хувиар санхүү, эрх зүйн дүн шинжилгээ хийж буйгаа илэрхийлэв.
Тэрбээр “Төгрөг нуур” ордын талаарх олон нийтэд хандсан анхааралтай асуудлыг онцолж, энэхүү ордын эзэмшлийн хүрээ, хувьцааны шилжилт, олон улсын оффшор дамжуулалтуудын баримтуудыг ил болгов. Хууль зүйн болон санхүүгийн шинжээчдийн тусламжтайгаар уг ордын үнэн бодит түүхийг тогтоосноо мэдэгдэв.
Н.Учрал дараах зүйлийг онцолж хэлсэн юм:
“Хэвлэл мэдээллээс авсан мэдээллээр “Төгрөг нуурын ордыг минийх гэж нотолж чадах юм бол 100 хувь аваарай” гэдэг үгийг УИХ-ын гишүүн Х.Баттулга гуай хэлсэн байна. Би ч бас өнөөдөр хариуцлагатайгаар хэлье. Та хэлсэн үгэндээ эзэн байгаарай. Та нотол гэсэн. Би нотолж байна.”
Хөдөлшгүй нотолгоо, эх сурвалж, мэргэжлийн дүгнэлт
Түүний танилцуулснаар 2006 онд УИХ-ын гишүүн асан Х.Баттулга, иргэн Я.Батсүх нарт харьяалагдаж байсан “Camex” компани “Төгрөг нуурын орд”-ыг бүрэн эзэмшиж байжээ. Энэхүү компанийн хувьцаа дараа нь Б.Намуун (тэрбүүний охин), Х.Цэндбаяр (эгч) нарт шилжиж, улмаар олон улсын оффшор компаниудаар дамжин, 250 сая ам.доллараар зарагдсан талаар баримт бий.
Мөн 2009 онд Сингапурт бүртгэлтэй компанитай Монгол Улсын Зам, тээвэр, барилга, хот байгуулалтын яам гэрээ байгуулж, дэд бүтэц, орон сууцны барилга байгууламжийн чиглэлээр хамтрах санамж бичигт гарын үсэг зурсан нь бүртгэгдсэн байна. Энэхүү гэрээг тухайн үед сайдаар ажиллаж байсан Х.Баттулга өөрийнхөө компанитай байгуулсан гэх үндэслэлтэй баримтууд ч байгаа аж.
Нэр өөрчлөлт, дамжуулалт, эзэмшлийн гинжин холбоо
“Camex” компанийн хувьцаа Хонг Конг болон Сингапурт бүртгэлтэй байгууллагуудад шилжиж, компанийн нэр олон удаа өөрчлөгдөж, “Монголын хөрөнгө оруулалтын групп” нэртэй болж байв. Хувьцаа эзэмшигчид дунд Х.Баттулгын охин Б.Намуун, хамтран бизнес эрхэлдэг байсан хүн байгааг баталгаажуулсан албан мэдээлэл цуглуулсан байна.
Мөн нэг анхаарал татахуйц баримтад дурдсанаар 2010 онд 250 сая ам.доллараар үнэлэгдэж байсан компанийн хувьцаа 2016 онд Монголд ирээд үнэ төлбөргүйгээр шилжсэн бөгөөд энэхүү гүйлгээнд “200 мянган доллароор ирсэн” гэх өөр мэдээлэл хавсаргатай байсан ч, гэрээгээр ямар ч төлбөргүй шилжүүлсэн нь тогтоогджээ.
Н.Учрал:
“Мэдлэг боловсролтой шинэ үеийн шилдэг санхүүч, хуульч, шинжээч нар ажилладаг шүү. Ямар ч нуун далдалсан схем байсан ил гаргаж чаддаг юм шүү гэдгийг онцолмоор байна” хэмээн мэдэгдэв.
Засгийн газрын шийдвэр: “Төгрөг нуурын орд”-ыг стратегийн ангилалд авахаар боллоо
Өнөөдрийн хуралдааны шийдвэрийн хүрээнд “Төгрөг нуур Энержи” компанийн ард буй “Camex” компанийг татварын булталт, мөнгө угаах, залилан, авлигын шинжтэй хэргүүдэд шалгуулахаар МУЕП болон АТГ-т материалуудыг шилжүүлсэн байна.
Мөн:
- ХЗДХ-ийн сайд О.Алтангэрэлд холбогдох нэмэлт материалуудыг бүрдүүлэх,
- АҮЭБ-ийн сайд Ц.Туваанд уг ордыг стратегийн ангилалд бүртгүүлэх, Үндэсний баялгийн санд шилжүүлэх ажил гүйцэтгэх үүрэг өгсөн байна.
