2025 оны зургадугаар сарын 11-нд Nintendo компани шинэ үеийн Switch 2 тоглоомын консолоос ердөө дөрөв хоногийн дотор 3.5 сая ширхэгийг борлуулсан тухайгаа зарлаж, компани түүхэндээ байгаагүй өндөр эхний өдрийн борлуулалтын амжилтаа тогтоолоо.
Японы технологийн аварга энэ тоо бол “Nintendo-ийн түүхэнд анхны дөрөв хоногийн дотор дэлхий даяар хамгийн их борлуулалт хийсэн төхөөрөмж” хэмээн тодорхойлжээ. Компани 2026 оны 3-р сар гэхэд 15 сая ширхэг Switch 2 борлуулах зорилготой бөгөөд энэхүү хурдан эхлэл нь зорилтоо биелүүлэхэд хүчтэй түлхэц өгч байгаа аж.
“Nintendo Switch 2-ыг хэрэглэгчид маань хэрхэн хүлээн авч, шинэ функц, тоглоомуудаар гэр бүл, найз нөхөдтэйгөө хамтдаа хөгжилдөж байгаад бид талархалтай байна,” хэмээн Nintendo of America-ийн ерөнхийлөгч Даг Баузер хэвлэлийн мэдэгдэлдээ дурджээ.
Шинэ төхөөрөмжид чиглэсэн сонирхол маш өндөр байсан бөгөөд Switch 2 нь анхны Switch (2017 онд гарсан, 152 сая ширхэг борлогдсон) төхөөрөмжөөс хойш Nintendo-ийн гаргасан анхны томоохон консол юм. 450 ам.долларын үнэтэй шинэ консолыг авахын тулд хэрэглэгчид дэлгүүрүүдийн гадаа хэдэн цагаар дугаарлаж, Best Buy зэрэг сүлжээ дэлгүүрүүд ажлын цагаа сунгах хүртэл арга хэмжээ авч байлаа.
Switch 2-ын техник хангамжид олон чухал сайжруулалт орсон бөгөөд энэ нь үнэ өссөн шалтгааны нэг гэж тайлбарлаж байна. Үүнд томорсон дэлгэц, сайжруулсан Joy-Con удирдлагууд, шинэ нийгмийн функцүүд багтжээ. Мөн хамгийн анхаарал татсан шинэлэг боломж бол Game Chat функц бөгөөд хэрэглэгчид консолын товчлуур дээр дарснаар тоглоомын үеэр шууд хоорондоо харилцах боломжтой болсон байна.
