Засгийн газрын ээлжит хуралдаанаар Нэмэгдсэн өртгийн албан татварын тухай хуулийн шинэчилсэн найруулгын төслийг хэлэлцэж, Улсын Их Хуралд өргөн мэдүүлэхээр шийдвэрлэлээ. Төслийг боловсруулахдаа иргэдийн татварын ачааллыг бууруулах, бодит орлогыг хамгаалах зорилт тавьсан бөгөөд шинэ хуулиар иргэдийн төлсөн НӨАТ-ыг шаталсан хэлбэрээр 100 хүртэл хувиар буцаан олгох зохицуулалт тусгагдсан байна. Энэхүү өөрчлөлт нь олон улсын чиг хандлага, зарчимд нийцсэн, оновчтой, хүртээмжтэй хөнгөлөлт, чөлөөлөлтийн тогтолцоог бий болгох зорилготой.
Мөн аж ахуйн нэгжүүдийн бизнесийн идэвхжлийг нэмэгдүүлэх, үйл ажиллагаагаа тэлэх боломжийг дэмжих, мөнгөн хөрөнгийн хомсдол болон эргэлтийн хөрөнгийн дарамтыг бууруулах чиглэлээр зохицуулалтууд туссан байна. Энэ нь бизнесийн орчныг шударга, бүх нийтэд тэгш болгох нөхцөлийг бүрдүүлэх юм. Үүнээс гадна хөдөлмөр эрхлэлтийг дэмжих хүрээнд ажилтнуудын хөгжлийг дэмжих, хүний нөөцийн бодлогыг сайжруулах, ажиллах нөхцөлийг сайжруулахад чиглэсэн татварын урамшуулал бий болно.
Гадаадын хөрөнгө оруулагчдад илүү таатай орчин бүрдүүлснээр хөрөнгө оруулалтыг нэмэгдүүлэх, улмаар Монгол Улсын татварын тогтолцоог олон улсын түвшинд өрсөлдөхүйц болгох боломж нээгдэнэ. Ингэснээр гадаадын хөрөнгө татах үйл явц илүү хялбар, хямд өртөгтэй болж, улсын нийт хөрөнгө оруулалтын хэмжээ өсөх хандлагатай байна. Энэ нь эдийн засгийн идэвхжилд эергээр нөлөөлнө гэж тооцоолжээ.
Татварын хуулийн шинэчлэл нь бизнес эрхлэгчдийн нийтлэг тулгардаг бэрхшээлүүдийг шийдвэрлэх боломжийг олгож, мөнгөн хөрөнгө, эргэлтийн хөрөнгийн дарамтыг бууруулж, үйл ажиллагаагаа өргөжүүлэх, хөгжих нөхцөлийг бүрдүүлнэ. Цаашид хиймэл оюун ухаан болон их өгөгдөлд суурилсан системийг татварын салбарт нэвтрүүлэх замаар татвар төлөгчид шаардлагатай мэдээллээ цаг алдалгүй авч, хууль тогтоомжийг дагаж мөрдөхтэй холбоотой асуудлуудыг урьдчилан шийдвэрлэх боломжтой болох аж. Энэ нь Монгол Улсад үйл ажиллагаа явуулж буй аж ахуйн нэгжүүд болон хөрөнгө оруулагчдад эерэг нөлөө үзүүлж, нийгэм, эдийн засагт давхар хувь нэмэр оруулах юм.
Эцэст нь иргэн, өрхийн татварын дарамтыг бууруулах, бодит орлогыг өсгөх, худалдан авах чадварыг нэмэгдүүлэх, өрхийн амьжиргааг дээшлүүлэх, бүс нутгуудын татварын бодлогыг бие даасан, өрсөлдөхүйц, онцлогтой болгох, татвар төлөгчдийн зардлыг бууруулах зэрэг олон эерэг үр нөлөөг авчирна гэж үзэж байна.
