9
Цаг уурын байгууллагаас өнөөдөр Улаанбаатар хот болон Төв, Сэлэнгэ, Дархан-Уул аймгийн нутаг дэвсгэр, мөн Дундговь аймгийн хойд хэсэгт ахиухан хэмжээний усархаг бороо орох эрсдэлтэй тухай сэрэмжлүүлэг гаргалаа. Үүнтэй холбогдуулан мэргэжлийн байгууллагууд иргэдэд урьдчилан сэргийлэх зөвлөмжийг хүргэж байна.
ОБЕГ-ын Ажиллагааны Шуурхай штаб наймдугаар сарын 19-нд төв болон орон нутгийн шуурхай штабын бүрэлдэхүүнтэй цахим хурал хийж, мэргэжил, арга зүйн зөвлөмж болон үүрэг чиглэлийг өгсөн байна.
Тус хурал, зөвлөмжийн дагуу дараах арга хэмжээнүүдийг хэрэгжүүлж эхэлжээ:
- Усархаг бороо, үерийн аюултай бүс нутгуудад иргэдэд сэрэмжлүүлэг, мэдээлэл хүргэх
- Ус орох эрсдэлтэй хашаа, байшинг тогтоон түр хамгаалалт хийх, суваг шуудууг цэвэрлэх
- Шуурхай штабууд өндөржүүлсэн бэлэн байдлаар ажиллах
- Шуурхай үед ажиллах алба хаагчид болон техник хэрэгслийн бэлэн байдлыг хангах
Ийнхүү холбогдох байгууллагууд эрсдэлийг бууруулах, үерийн аюулаас хамгаалах зорилгоор урьдчилан сэргийлэх шуурхай арга хэмжээг авч хэрэгжүүлж байна.
