Жил бүрийн тавдугаар сарын 15-ныг “Олон улсын гэр бүлийн өдөр” хэмээн тэмдэглэх шийдвэрийг Нэгдсэн Үндэстний Байгууллагын Ерөнхий Ассамблейгаас гаргаснаас хойш 32 жил өнгөрч байна. Монгол Улсын хувьд 2003 онд батлагдсан “Нийтээр тэмдэглэх баярын болон тэмдэглэлт өдрүүдийн тухай” хуулийн хүрээнд уг өдрийг 22 дахь жилдээ албан ёсоор тэмдэглэж байна.
Гэр бүл нь аливаа нийгмийн үндсэн нэгж бөгөөд энэхүү өдөр нь гэр бүлийн үнэт зүйл, үүрэг хариуцлага, ач холбогдлыг онцлон харуулж, дэлхийн улс орнуудад гэр бүлүүдийн өмнө тулгамдаж буй асуудлуудад анхаарал хандуулах зорилготой юм.
2025 оны уриа:
“Гэр бүлд чиглэсэн бодлого нь тогтвортой хөгжилд хүрэх зам: Нийгмийн хөгжлийн хоёрдугаар дэлхийн дээд хэмжээний уулзалт руу”
Энэхүү уриа нь гэр бүлийг зөвхөн хувь хүний амьдралын суурь төдийгүй, нийгмийн тогтвортой хөгжилд хүрэх түлхүүр хэмээн харж, гэр бүлийн төлөө баримтлах бодлогын ач холбогдлыг онцолж байна.
