Орос гимнастикч Дэлхийн цомгийн тэмцээний үеэр Украины төрийн далбаанаас илтэд нүүр бурууллаа

Болгар улсын Софи хотод болсон гимнастикийн Дэлхийн цомгийн шатны тэмцээний үеэр Украины төрийн бэлгэ тэмдгийг илтэд үл хүндэтгэсэн явдал гарсантай холбогдуулан Украины Гимнастикийн холбоо албан ёсны мэдэгдэл гаргалаа.

Шагнал гардуулах ёслолын үеэр “төвийг сахисан” статустай оролцож байсан Оросын тамирчин Украины төрийн далбаа руу зориуд нуруугаа харуулан зогссон байна. Тус холбооны зүгээс энэхүү үйлдлийг албан ёсны арга хэмжээний ёс зүйн хэм хэмжээг бүдүүлгээр зөрчсөн бөгөөд спортын шударга өрсөлдөөний зарчимд харшилсан үйлдэл гэж дүгнэжээ.

“Шагнал гардуулах ёслол бол тэмцээний албан ёсны хэсэг бөгөөд ёс зүйн хэм хэмжээг чанд сахихыг шаарддаг. Бусад тамирчдын төрийн далбаа руу харахаас илт татгалзах нь өрсөлдөгч тамирчин болон зохион байгуулагчдыг үл хүндэтгэж буй хэрэг юм” гэж мэдэгдэлд онцолсон байна.

Украины тал энэхүү явдлыг Оросын тамирчдыг төвийг сахисан статустай тэмцээнд оролцуулж буй шийдвэрийг эргэн харах нэг томоохон үндэслэл гэж үзэж байна. Түүнчлэн дайны нөхцөлд ийм үйлдэл гаргах нь улс төрийн дайсагнал, идэвхгүй түрэмгийллийн нэг хэлбэр бөгөөд байнгын дарамт, стресс дор тэмцээнд оролцож буй Украины тамирчдыг доромжилсон хэрэг гэж тайлбарлалаа.

Украины Гимнастикийн холбоо уг асуудлаар Олон улсын гимнастикийн холбоо (FIG) болон Олон улсын олимпын хороонд (IOC) албан ёсоор гомдол гаргахаа мэдэгдэв. Тэд тухайн тамирчны тэмцээний дүнг хүчингүй болгож, төвийг сахисан статусыг нь цуцлах, цаашид тамирчдад тавих шалгуурыг чангатгахыг шаардах ажээ. Спортын талбар нь бие биенээ хүндэтгэх, шударга өрсөлдөх орон зай байх ёстой бөгөөд төрийн бэлгэ тэмдгийг үл хүндэтгэх явдлыг тэвчих ёсгүй гэдгийг холбооны зүгээс хатуу анхааруулсан байна.