Британийн домогт Пинк Флойд (Pink Floyd) хамтлаг өөрсдийн хамгийн алдартай бүтээлүүдийн нэг болох “Wish You Were Here” дуундаа албан ёсны видео клип хийж танилцууллаа.
Уг видеог тус дуу багтсан ижил нэртэй цомгийн 50 жилийн ойд зориулан гаргажээ. “Wish You Were Here” цомог нь 2025 оны 12 дугаар сарын эхээр дижитал болон биет хэлбэрээр шинэчлэгдэн дахин хэвлэгдсэн юм. Клипний дүрслэл нь бэлгэдлийн шинж чанартай болон психоделик (сэтгэцэд нөлөөлөхүйц хийсвэр) зураглалуудын эвлүүлэг аж.
Видеоны онцлогоос:
- Эхлэл: Видео сарны дүрсээр эхэлж, үзэгчдийг сюрреалист зургуудын урсгалд аваачдаг.
- Дүрслэл: Эдгээр хийсвэр үзэгдлүүдийг хамтлагийн архивын хар цагаан бичлэгүүдтэй сүлж өгсөн нь түүхэн мэдрэмж төрүүлнэ.
Ойн баярыг тохиолдуулан хамтлагийнхан Их Британи, Европ болон АНУ-д хэд хэдэн “pop-up” дэлгүүр нээж, “Brain Damage” фэн сэтгүүлийн онцгой хэвлэлийг худалдаалж байгаа юм. Мөн Британийн инээдмийн жүжигчин, зураач Ноэл Филдинг хамтлагийг үндэслэгч Сид Барреттаас сэдэвлэн “Shine On You Crazy Diamond” хэмээх баатарлаг дуунд зориулсан цуврал зургуудыг бүтээжээ.
