Лхагва гарагт АНУ-ын Ерөнхийлөгч Дональд Трамп болон ОХУ-ын Ерөнхийлөгч Владимир Путин нар 1 цаг 15 минут үргэлжилсэн утасны яриа хийж, олон чухал асуудлыг хэлэлцжээ. Хамгийн гол сэдэв нь Ням гарагт Украины тал зохион байгуулсан дроны халдлага байсан бөгөөд энэ ажиллагаанд ОХУ-ын газар нутгийн гүнд байрлах дөрвөн агаарын бааз довтолгоонд өртөж, стратегийн бөмбөгдөгч онгоцнууд устгагдсан юм.
«Бид Украины зүгээс Оросын агаарын баазууд руу хийсэн халдлагын талаар болон хоёр талын явуулж буй бусад цэргийн ажиллагааны талаар хэлэлцлээ. Яриа эерэг уур амьсгалтай байсан ч энх тайвныг шууд тогтоох түвшнийх байгаагүй» хэмээн Трамп өөрийн сошиал хуудсаараа дамжуулан мэдээлэв. Тэрээр мөн “Ерөнхийлөгч Путин агаарын баазуудын эсрэг халдлагын хариуд хариу арга хэмжээ авна гэдгээ маш тодорхой, хатуу хэлсэн” хэмээн онцолжээ.
Путин утсаар ярих үеэр Украины халдлагын талаар урьдчилан мэдээлэл аваагүй гэдгээ Трамп илэрхийлсэн болохыг Кремлиэс мэдэгдсэн байна. Түүнчлэн АНУ-ын ерөнхийлөгч анх удаа Оросын агаарын хүчний суурь бүтэц рүү хийсэн Украины халдлагын талаар олон нийтэд байр сууриа илэрхийлсэн нь энэ юм.
Түүнчлэн ярианы үеэр тэд Ойрх Дорнод дахь зөрчил болон Ираны цөмийн хөтөлбөрийн талаар ярилцаж, энэ чиглэлд Оросын талаас хэрхэн дэмжлэг үзүүлэх боломжтой талаар санал солилцсон тухай Ерөнхийлөгчийн туслах Юрий Ушаков сэтгүүлчдэд мэдээлсэн байна.
Орос, АНУ хоёр нийлээд дэлхийн нийт цөмийн зэвсгийн 88 орчим хувийг эзэмшдэг бөгөөд эдгээр зэвсгийг агаараас, хуурай газраас болон далай тэнгисээс харвах гэсэн гурван үндсэн аргаар ашигладаг. Украин “Аалзны тор” нэртэй энэхүү дрон халдлагаараа ОХУ-ын агаараас харвах чадавхид ноцтой хохирол учруулсан байх магадлалтай хэмээн шинжээчид үзэж байна.
Мөн Мягмар гарагт Украины тал Крымийн гүүрний тулгуур хэсэгт дэлбэлэлт зохион байгуулсан бөгөөд үүнийг Владимир Путин “террорист халдлага” хэмээн тодорхойлж, “Киевийн дэглэм энх тайвныг хүсэхгүй байна. Терроризм үйлдэж буй хүмүүстэй бид яаж хэлэлцээ хийх вэ?” гэж мэдэгдсэн байна.
Гэсэн ч Путин одоог хүртэл агаарын баазууд руу хийгдсэн халдлагын талаар олон нийтийн өмнө албан ёсны мэдэгдэл хийгээгүй байгаа юм. Харин ОХУ-ын албаны бусад хүмүүс үүнд Өрнөдийн орнуудыг буруутгаж буй. Тухайлбал, ОХУ-ын гадаад хэргийн дэд сайд Сергей Рябков “Бид Лондон болон Вашингтоныг нөхцөл байдлыг хурцатгахгүй байх үүрэг хүлээхийг уриалж байна” гэж мэдэгдсэн талаар “Интерфакс” агентлаг мэдээлжээ.
Харин АНУ болон Их Британи аль аль нь Ням гарагт болсон дроны довтолгооны талаар урьдчилан ямар ч мэдээлэл байгаагүй хэмээн албан ёсоор баталсан байна.
