С.Бямбацогт: Төрийн албыг цомхон болгож, татаасаар орсон хүмүүсийг хална

Засгийн газар 2025 оны наймдугаар сарын 20-ны өдрийн ээлжит хуралдаанаар яам, агентлагуудын бүтцийн шинэчлэл, орон тооны цомхотголын асуудлыг хэлэлцэж, хэрэгжүүлэх шийдвэр гаргалаа.

Засгийн газрын хэрэг эрхлэх газрын дарга С.Бямбацогт энэ талаар мэдээлэл хийхдээ:

“Яам, агентлагийн бүтцийг цомхон, чадварлаг болгох зорилгоор тогтоол баталлаа. Дарга нарын татаас, түлхээсээр орсон хүмүүсийг халж, төрийн албыг илүү хариуцлагатай болгоно” хэмээн онцоллоо.

Цомхотголын үндсэн өөрчлөлтүүд

• Засгийн газрын харьяа 35 агентлагийн нийт 3353 орон тоо 9 хувиар буурч, 3052 болжээ.
• Агентлаг доторх газар, хэлтэс, тасгийн тоог цөөлснөөр нийт 301 орон тоог хассан.
• Үүний үр дүнд даргын албан тушаал 54-өөр багасч, зөвхөн цалин хөлснөөс 10 орчим тэрбум төгрөг хэмнэх боломж бүрджээ.
• Нэмэлтээр газар, хэлтсийн дарга нарын цомхотгол болон зарим хороо, зөвлөлийг татан буулгаснаар нийтдээ 60 орчим тэрбум төгрөгийн хэмнэлт гарч, боловсрол, эрүүл мэндийн салбарт зарцуулагдана.

Шинэ бүтэц ба зарчим

• Агентлагууд орлогч, дэд даргатай байхгүй. Хуулиар заасан тохиолдолд л ийм албан тушаал үлдэнэ.
• Урьд нь газар, хэлтэс, алба, тасаг зэрэг олон шатлалтай байсан бол цаашид зөвхөн газар, хэлтсийн бүтэцтэй байна.
• Яам, агентлагийн чиг үүргийг давхардалгүй, хийдэлгүй байхаар шинэчилжээ.

Төрийн албаны үнэлгээг шинэчилнэ

С.Бямбацогтын хэлснээр, УИХ-ын намрын чуулганд төрийн албаны хуулийн шинэчилсэн найруулгыг өргөн барьж хэлэлцүүлэхээр бэлтгэж байна. Шинэчлэлийн хүрээнд:

• Төрийн албан хаагчдын гүйцэтгэлийн үнэлгээ ил тод болно.
• Иргэдийн үнэлгээг голлон тусгаж, төрийн байгууллагын бодит үр дүнг харгалзах.
• Сайн ажилласан, хариуцлагатай төрийн албан хаагчдыг урамшуулах, хариуцлагагүй, цаг хийдүүлдэг хүмүүсийг халахад чиглэнэ.