“Монгол Улсад эмчлэгддэггүй өвчлөлийг бууруулах бодлого”-ын хүрээнд Сэтгэцийн эрүүл мэндийн үндэсний төв (СЭМҮТ)-ийн Хүүхдийн клиникийн эмч нар Турк улсад мэргэшүүлэх сургалтад хамрагдаж, аутизмын оношилгооны “ADOS-2” аргачлалын онол болон дадлага сургалтыг дүүргэжээ.
Уг сургалтын дараа тус эмч нар СЭМҮТ-д олон улсын стандартад нийцсэн “ADOS-2” оношилгоо, үнэлгээний аргачлалаар ажиллаж эхэлсэн бөгөөд энэ нь Монголын сэтгэцийн эрүүл мэндийн салбарт аутизмыг нарийн оношлох шинэ шатанд гаргасан үйл явдал болж байна.
“ADOS-2” аргачлалын онцлог
“ADOS-2” нь аутизмын хүрээний эмгэгийг оношлох дэлхий нийтэд хүлээн зөвшөөрөгдсөн арга бөгөөд асуулт, дадлага, даалгаврын хариу үйлдэл, зан үйлийн ажиглалт дээр тулгуурлан онош тогтоодог. Энэ аргаар тухайн хүүхдийн нийгмийн харилцаа, харилцааны ур чадвар, зан үйлийн онцлог зэргийг үнэлэх боломжтой.
Даалгавруудыг тухайн хүүхдийн нас, хөгжлийн түвшинд тохируулан боловсруулдаг учир оношилгооны үр дүн өндөр, онош тодорхойлох нарийвчлал сайтай гэж үздэг байна.
ХӨҮК-ын шинэчлэл
2023 оны аравдугаар сард ашиглалтад орсон СЭМҮТ-ийн шинэ цогцолборын хүрээнд Хүүхэд Өсвөр Үеийн Клиник (ХӨҮК) нь 3-18 насны хүүхдүүдэд 20 ортойгоор үйлчилж байгаа бөгөөд өвчтөнд ээлтэй, ая тухтай орчинд чанартай тусламж үйлчилгээ үзүүлэх нөхцөл бүрджээ.
