2025 оны долоодугаар сарын 25 — Мэргэжлийн бөхийн дэлхийн хэмжээний од, шоу бизнесийн салбарын домог болсон Халк Хоган 71 насандаа таалал төгссөн тухай World Wrestling Entertainment (WWE) албан ёсоор мэдээллээ.
“Поп соёлын нүүр царай” — WWE гүн эмгэнэл илэрхийлэв
“WWE-гийн Алдрын танхимын гишүүн Халк Хоган нас барсан тухай мэдээг гүнээ эмгэнэн дуулгаж байна. Поп соёлын хамгийн алдартай бие хүмүүсийн нэг болох тэрбээр 1980-аад оны үед WWE дэлхийн даяар хүлээн зөвшөөрөгдөхөд ихээхэн хувь нэмэр оруулсан юм” хэмээн тус байгууллага өөрсдийн албан ёсны хуудастаа нийтэлжээ.
Зүрхний шигдээсийн улмаас нас баржээ
Флорида дахь гэртээ зүрх нь гэнэт зогссоны улмаас амьсгал хураасан хэмээн Хоганы менежер NBC News-д ярьсан байна. Түүнийг аварга биетэй, мушгиа цагаан сахал, толгойны алчуураар нь дэлхий нийт таньдаг байсан.
Бөхийн урлагийг поп соёлд нэгтгэсэн хүн
1980-аад онд мэргэжлийн рестлингийн нүүр царай болсон Хоган уг спортыг олон тэрбум долларын ашиг бүхий гэр бүлүүдийн үзвэр болгон хувиргаж чадсан юм. Тэрбээр алдарт “Рокки-3”, “Булчинлаг Санта” зэрэг Холливүүдийн кинонуудад амжилттай тоглож байсан.
Алдрын оргил: WrestleMania III ба дэлхийн аварга цол
Жинхэнэ нэр нь Жин Боллеа. Тэрээр 1953 онд Жоржиагийн Огаста хотод төрсөн бөгөөд дараа нь Флоридад суурьшжээ. Залуу насандаа рок хамтлагт басс гитар тоглож байсан тэрээр 1970-аад онд рестлинг сонирхож, тамирчны замналаа эхлүүлжээ.
1987 онд Мичиганы Pontiac Silverdome-д болсон WrestleMania III шоунд Францын домогт бөх “Үлэмж” Андрег ялснаар олны танил болж, 1984 онд “Төмөр Шейх”-ийг ялж WWF-ийн дэлхийн аварга цолыг хүртжээ. Тэр уг цолоо дөрвөн жилийн турш хадгалж чадсан бөгөөд Sports Illustrated сэтгүүлийн нүүрэнд гарч, попын ододтой хамт тоглолт хийх болсон нь нэр хүндийг нь улам нэмэгдүүлсэн.
Хорон санаатны дүр ба шинэ эрин
Хожим Хоган World Championship Wrestling холбоонд элсэж, шар өнгийн трикогоо хар өнгийнхөөр сольж, “Дэлхийн шинэ дэг журам” хэмээх бүлгийн гишүүн болсон нь түүний карьерын шинэ үеийг эхлүүлсэн. Дараа нь тэрбээр 2002 онд WWF-д эргэн ирж, Дуэйн Жонсонтой хамт WrestleMania шоунд оролцсон байна.
Түүнийг WWE-гийн Алдрын танхимд хоёр удаа бичигдсэн цөөн хүмүүсийн нэг бөгөөд өөрийгөө рестлингийн “Бейб Рут” хэмээн нэрлэдэг байв.
Гэр бүл, хувийн амьдрал ба улс төрийн байр суурь
Халк Хоган амьдралдаа гурван удаа гэрлэж, хоёр хүүхдийн аав болжээ. Анхны эхнэр Линдагийн хамт 2005–2007 онд “Hogan Knows Best” реалити шоуны гол дүрд оролцсон байна.
Түүнчлэн Хоган АНУ-ын Ерөнхийлөгч асан Дональд Трампыг олон жилийн турш ил тод дэмждэг байсан. WrestleMania шоуг Трампын санаачилгаар төрөлх хотдоо зохион байгуулж байхад Хоган гол дүрд тоглож байжээ.
