2025 оны зургаадугаар сарын 5-ны өглөөний 01:36 цагт Баянзүрх дүүргийн 34-р хорооноос гэр шатаж байна гэсэн дуудлага Онцгой байдлын ерөнхий газарт ирсэн байна.
Дуудлагын дагуу Онцгой байдлын хэлтсийн 63 дугаар ангийн алба хаагчид газар дээр нь очиход тавын ханатай залгаа хоёр гэр бүрэн шатаж байсан бөгөөд шуурхай ажиллан галыг унтраажээ.
Харамсалтай нь энэ ослын улмаас уг байранд амьдарч байсан хоёр насанд хүрсэн хүн, гурван хүүхэд амиа алдсан байна. Галд нэрвэгдэгсдийн цогцсыг тухайн дүүргийн Цагдаагийн гуравдугаар хэлтэст шилжүүлэн өгчээ.
Одоогоор галын шалтгааныг мэргэжлийн байгууллагууд тогтоохоор ажиллаж байгаа бөгөөд Онцгой байдлын байгууллагаас иргэдийг галаас урьдчилан сэргийлэх, цахилгаан, дулаан халаагуурын аюулгүй хэрэглээг чанд сахих талаар анхааруулж байна.
