Холливудын залуу од Тимоти Шаламе балет болон дуурийн урлагийн үнэ цэнийн талаар хэлсэн таагүй үгнээсээ болж урлагийн салбарынхны дургүйцлийг төрүүлээд байна. Түүний байр суурийг мэргэжил нэгтнүүд болон шүүмжлэгчид “хэтэрхий өрөөсгөл”, “соёлын мэдрэмжгүй” хэмээн дүгнэжээ.
Өдгөө 30 настай жүжигчин залуу хоёрдугаар сард Variety сэтгүүлээс зохион байгуулсан шууд ярилцлагад Мэттью Макконехийн хамт оролцож, орчин үеийн үзэгчдийн анхаарал төвлөрөлт богиноссон талаар хөөрөлдсөн юм. Ярианы үеэр тэрээр залуу үеийнхэн удаан хэмнэлтэй бүтээлийг сонирхохгүй болсныг дурдаад, балет болон дуурийн салбарыг жишээ болгон татжээ. Шаламе хэлэхдээ:
- “Би ‘хэдийгээр хэн ч сонирхохоо больсон ч биднийг үзээч, амьд үлдээгээч’ гэж гуйж явдаг дуурь, балетын салбарт ажиллахыг хүсэхгүй” хэмээн егөөдсөн байна.
- Хэдийгээр тэрээр дараа нь “балет, дуурийнхныг хүндэлдэг” гэж нэмж хэлсэн ч уг бичлэг цацагдсаны дараа томоохон маргаан дэгдээв.
Дуурийн нэрт дуучин Изабел Леонард түүнийг шүүмжилж, “жинхэнэ уран бүтээлч хүн бусад урлагийн төрлийг ийм явцуу хүрээнд харж, дорд үзэх ёсгүй” хэмээн байр сууриа илэрхийлжээ.
Кино салбарын шинжээчдийн үзэж буйгаар, Тимоти Шаламегийн энэхүү мэдэгдэл түүний Оскарын шагналын кампанит ажилд сөргөөр нөлөөлж болзошгүй юм. Академийн шагналд нэр дэвшигчдийн хувьд урлагийн бүхий л салбарын дэмжлэгийг авах нь чухалд тооцогддог тул энэхүү маргаан түүний нэр хүндэд тодорхой хэмжээний сэв суулгаж магадгүй байна. Жүжигчин одоогоор энэхүү шүүмжлэлийн хариуд албан ёсны тайлбар өгөөгүй байгаа бөгөөд уг асуудал соёлын хүрээнийхний дунд халуун сэдэв хэвээр байна.
