Дархан аварга Г.Өсөхбаярын хүү Ө.Дэмиджамц саяхныг хүртэл «Сэйхакүхо» нэртэйгээр барилдаж байсан бол Исэгахама дэвжээний шинэчлэлийн хүрээнд Тошинофүжи хэмээх шинэ нэртэй боллоо. Одоо 25 настай тэрбээр 195 см өндөр, 141 кг жинтэй бөгөөд бие бялдрын хувьд мэргэжлийн сүмод цахиур хагалах бүрэн боломжтойд тооцогдож байна.
Түүний амжилт ба чансаа
Тошинофүжи одоогоор Макүшита зиндааны хоёрдугаар байрт эрэмбэлэгдэж байна. Энэ нь түүнийг мэргэжлийн сүмогийн дээд зиндаа руу орох хамгийн чухал даваа болох «Сэкитори» цол хүртэхэд ердөө ганц алхам үлдсэнийг илтгэж байгаа юм.
Тэрбээр Макүшитагийн 45 дугаар эрэмбээс барилдаж эхэлснээсээ хойш нийт таван башёд дараалсан амжилттай барилдсан:
- 5-2, 4-3, 5-2, 5-2, 4-3 гэсэн үзүүлэлттэйгээр тогтмол 50-иас дээш хувийн ялалт (качи-коши) байгуулж иржээ.
- Ирэх нэгдүгээр сарын башёд дахин даваа илүүрхэх юм бол «Жюүрёо» зиндаанд дэвших нь бараг тодорхой болоод байна.
Исэгахама дэвжээний «Фүжи» нэршлийн давалгаа
Ө.Дэмиджамцын нэрээ өөрчилсөн нь Исэгахама дэвжээний нийтлэг шинэчлэлтэй холбоотой. Тус дэвжээний 31 бөхийн 29 нь одоо “фүжи” оролцсон нэртэй болсон нь дэвжээний нэгдмэл байдал, хүчирхэг уламжлалыг илэрхийлж байгаа юм. Үүний нэг жишээ нь Маэгаширагийн гуравт эрэмбэлэгдсэн Хакүохо нэрээ өөрчилж, Хакүнофүжи болсон явдал юм.
Түүнчлэн нэгдүгээр сарын башёд Монголчуудын анхаарлыг татаж буй өөр нэгэн бөх бол Улсын гарьд Д.Рагчаагийн хүү Асахакүрюү Р.Жамьянтогтох юм. Тэрбээр энэ удаагийн башёд анх удаа дээд зиндаа буюу Макүүчид дэвшин барилдахаар болоод байна.
