Оросын зүгээс Украины эсрэг хийсэн хамгийн том дрон ашигласан халдлага өнгөрсөн Ням гарагт болсон тухай Украины зэвсэгт хүчин мэдээлэв. Энэхүү довтолгоо нь АНУ-ын Ерөнхийлөгч Дональд Трамп болон ОХУ-ын Ерөнхийлөгч Владимир Путин нарын утасны ярианаас нэг хоногийн өмнө болжээ. Талууд үүнээс хоёр хоногийн өмнө буюу Баасан гарагт Истанбул хотод уулзаад байсан юм.
Нутгийн цагаар өглөөний 8:00 цагт Оросын тал Украины хэд хэдэн бүс нутгийг 273 ширхэг дрон ашиглан бөмбөгдсөн бөгөөд халдлагын гол бай нь нийслэл Киев орчим байв. Украины мэдээлснээр, 88 дроныг сөнөөж, 128-ыг саармагжуулж хор хөнөөлгүй болгож чаджээ.
Энэхүү халдлагын улмаас Киев мужийн Обухов дүүрэгт нэг иргэн амиа алдаж, гурван хүн шархадсанаас дөрвөн настай хүүхэд багтсан байна.
• Энэ нь 2022 оны хоёрдугаар сарын 23-нд болсон өмнөх хамгийн том дроны довтолгоог давсан шинэ дээд амжилт болов. Тухайн үед Оросын зүгээс 267 дрон ашигласан байна.
• Оросын Батлан хамгаалах яам мөн Ням гарагийн шөнө болон өглөөний хооронд Украины 25 дроныг устгасан тухай мэдээлэв.
Маргааш нь Трамп болон Путин нар Украины дайнтай холбоотой асуудлаар утсаар хэлэлцэх товтой байгаа бол Германы канцлер Фридрих Мерц өчигдөр Их Британи, Франц, Польшийн удирдагчдын хамт Трамптай цахим уулзалт хийхээр болсноо зарласан юм. Дээрх удирдагчид тавдугаар сарын 10-нд Киевт айлчилж, ОХУ-д гал зогсоох санал тавьсан байдаг.
Энэ уулзалтын үеэр тэд:
- 30 хоногийн хугацаатай урьдчилсан болзолгүй гал зогсоох санал дэвшүүлсэн
- Хүлээж авахгүй бол нэмэлт хориг арга хэмжээ авна хэмээн анхааруулсан
Гэсэн ч Москвагийн зүгээс тодорхой хариу өгөөгүй байна. Харин Украины тагнуулын байгууллага Орос улс ойрын хугацаанд тив алгасагч баллистик пуужин харваж болзошгүй талаар анхааруулжээ.
Украины эрх баригчид Ням гарагийн дронуудын довтолгоог Оросын зүгээс энхийн яриа хэлэлцээнд ач холбогдол өгөхгүй байгаагийн нотолгоо гэж үзэж байна.
“Оросын хувьд Баасан гарагийн Истанбулд болсон яриа хэлэлцээ зүгээр л дүр эсгэсэн үйлдэл байжээ. Путин дайныг хүсэж байна” гэж Украины Ерөнхийлөгчийн туслах Андрей Ермак мэдэгдэв.
АНУ-ын Ерөнхийлөгч Дональд Трамп ч мөн 30 хоногийн гал зогсоох санал дэвшүүлсэн. Украины зүгээс энэ санаачилгыг дэмжиж, хэрэгжүүлэхэд бэлэн гэдгээ илэрхийлсэн бол Оросын тал зэр зэвсгийн тусламжийг зогсоох нөхцөл тавьж байна.
Путин мөн хэлэлцээрийн үед дараах үндсэн шаардлагыг тавьж байна:
- Украинд төвийг сахисан статус олгох
- Цэргийн хүчийг нь сулруулах
- НАТО-д элсэхийг хориглох
Киевийн эрх баригчид дээрх шаардлагыг бууж өгсөнтэй адил гэж үзэж буй. Одоогоор ОХУ Украины газар нутгийн 20 орчим хувийг, мөн 2014 онд нэгтгэсэн Крымийн хойгийг хянаж байна.
