27
Монгол Улсын Ерөнхийлөгч У.Хүрэлсүх XVII жарны “Сүрээр дарагч” хэмээх Гал морин жилийн Сар шинийн баярыг тохиолдуулан нийт ард түмэндээ хандан баярын мэндчилгээ дэвшүүллээ. Тэрбээр мэндчилгээндээ улиран одож буй жилийн ололт амжилтыг дүгнэхийн зэрэгцээ ирж буй шинэ жилийн зорилт, бэлгэдлийг онцлон тэмдэглэв.
Улиран одож буй Модон могой жилийн онцлох амжилтууд:
- Хүн ам зүй: Монгол Улсын хүн ам 60 гаруй мянган хүүхдээр бүл нэмж, нийт гурван сая 592 мянгуулаа боллоо.
- Хөдөө аж ахуй: Мал сүргийн тоо толгой 60 саяд хүрч, тариаланчид 745 мянган тонн ургац хураан авсан байна.
- Эдийн засаг: Улсын эдийн засаг зургаан хувиар өсөж, нэг хүнд ногдох ДНБ 7,000 ам.долларыг давлаа. Гадаад валютын нөөц зургаан тэрбум ам.долларт хүрч, зээлжих зэрэглэл түүхэн дээд түвшиндээ очсон байна.
- Гадаад харилцаа: Төрийн айлчлалууд амжилттай болж, Монгол Улсын нэр хүнд олон улсын тавцанд өсөн бэхжиж, соёл уламжлалаа дэлхий дахинд сурталчилсан жил байлаа.
Ирж буй Гал морин жилийн түүхэн тэмдэглэлт үйл явдлууд:
- Их Монгол Улсын ой: Энэ онд Их Монгол Улс байгуулагдсаны 820 жилийн тэгш ой тохиож байна.
- Төрийн тахилга: Их хаанд “Чингис” цол өргөмжилсөн Хар Зүрх уул болон цэнгэг усны эх болсон Хөвсгөл нуурыг Төрийн тахилгатай болгох шийдвэр гаргажээ. Ингэснээр Монгол Улс түүхэндээ анх удаа төрийн тахилгат нууртай болж байна.
- Дэлхийн адууны өдөр: Монголчуудын бахархал болсон морио алдаршуулах зорилгоор гаргасан санаачилгыг НҮБ дэмжиж, “Дэлхийн адууны өдөр”-ийг жил бүрийн долоодугаар сарын 11-нд тэмдэглэж байхаар боллоо.
Ерөнхийлөгч мэндчилгээнийхээ төгсгөлд “Сүрээр дарагч” хэмээх Гал морин жилдээ улс үндэстнээрээ хамтдаа хичээн зүтгэж, төр төвшин, түмэн олон амгалан байхын өлзийтэй ерөөлийг өргөн дэвшүүлэв.
