Монгол Улсын Ерөнхий сайд Г.Занданшатар шинэ Засгийн газрын бүрэлдэхүүнийг УИХ-д танилцуулахаар бэлтгэл хангаж байгаа энэ үед Боловсрол, шинжлэх ухааны сайдаар нэр дэвшээд байсан УИХ-ын гишүүн П.Ганзориг албан тушаалаас татгалзаж, нэрээ татжээ.
Тэрбээр “Өнөөдөр ХҮН намын Төлөөлөх зөвлөл хуралдаж, Ерөнхий сайдын хамтран ажиллах саналыг хэлэлцэн 97 хувийн саналаар дэмжсэн. Хамтарсан Засгийн газарт боловсрол, эрчим хүчний салбарын бодлогыг тууштай үргэлжлүүлэх нь чухал гэж үзсэн. Гэсэн ч би энэ удаад сайдын албыг авахгүй гэж шийдлээ. Бидэнд боловсролын салбарыг авч явж чадах олон чадварлаг залуус бий. Тиймээс би тэднийг дэмжин ажиллана. Тухайлбал, Шадар сайдаар Т.Доржханд, Боловсролын сайдаар П.Наранбаярыг үргэлжлүүлэн ажиллахыг дэмжиж байна” хэмээн мэдэгдэв.
Ийнхүү Засгийн газрын шинэ бүрэлдэхүүнд өөрчлөлт орох нөхцөл бүрдэж, П.Ганзориг Боловсролын сайдын албан тушаалд нэрээ татан авч, ХҮН намын дотоод бодлогын хүрээнд шинэ залуу удирдлагуудыг дэмжих чиг баримжаа баримталж буйгаа илэрхийллээ.
