2025 оны зургадугаар сар Монголын спортын түүхэнд онцгой дурсагдахаар болж байна. Улаанбаатар хотын төв талбай, Сүхбаатарын талбайд 3х3 сагсан бөмбөгийн дэлхийн хамгийн нэр хүндтэй гурван тэмцээнийг цувралаар зохион байгуулах гэж байна. Эдгээр нь эмэгтэйчүүдийн Дэлхийн цуврал “FIBA 3×3 Women’s Series Ulaanbaatar 2025” (зургаадугаар сарын 18–19), эрэгтэйчүүдийн Дэлхийн Их Дуулга “FIBA 3×3 Ulaanbaatar World Tour” (зургаадугаар сарын 20–21), мөн 3х3 насанд хүрэгчдийн Дэлхийн аварга шалгаруулах тэмцээн (зургаадугаар сарын 23–29) юм.
Эмэгтэйчүүдийн цуврал тэмцээнд чансаагаараа дэлхийд эхний байруудыг эзэлдэг Герман, Канад зэрэг улсын багууд болон Монголын “Улаанбаатар Амазонс” баг оролцоно. Эрэгтэйчүүдийн World Tour тэмцээнд Сербийн Лиман, Бахрейны Риффа, БНХАУ-ын Чонмин зэрэг багууд өрсөлдөх бөгөөд Монгол Улсаас “ММС Энержи” болон “Сайнскор” багууд багтжээ. Эдгээр мэргэжлийн тэмцээний дараа 3х3 сагсан бөмбөгийн насанд хүрэгчдийн Дэлхийн аварга шалгаруулах тэмцээн явагдах бөгөөд дэлхийн 27 орны 40 баг оролцохоор Улаанбаатар хотод ирнэ.
Монголын сагсан бөмбөгийн холбооны ерөнхийлөгч Л.Мягмаржавын хэлснээр, Монгол Улс 2017 оноос хойш олон улсын чанартай 26 тэмцээн зохион байгуулсан туршлагатай бөгөөд энэ удаад дэлхийн хэмжээний гурван тэмцээнийг нэгэн зэрэг зохион байгуулах бэлтгэл ажилд 200 гаруй мэргэжилтэн оролцож байна. Тэрбээр “3х3 сагсан бөмбөг нь олимпод багтдаг төрөл бөгөөд Монгол Улсад хурдацтай хөгжиж байгаа. Бид Дэлхийн аваргыг өөрийн нутаг дээр зохион байгуулснаар дэлхийн 150 гаруй оронд шууд дамжуулалт хийн, 500 гаруй гадаадын албаны хүмүүс болон тамирчдыг хүлээн авах болно” хэмээн онцоллоо.
Мөн холбооны ерөнхий нарийн бичгийн дарга С.Төгсжаргал “Манай холбоо дэлхийн Ази, насны ангиллын бүх төрлийн томоохон 3х3 тэмцээнүүдийг зохион байгуулсан дэлхийн цор ганц улс болж байна. Энэ нь манай тамирчдын амжилт болон зохион байгуулалтын түвшинг дэлхий үнэлж байгаагийн илэрхийлэл” гэж мэдэгджээ.
Монголын шигшээ багийн тамирчин Д.Дэлгэрнямын мэдээлснээр, эрэгтэйчүүдийн баг Э.Дэлгэрням, А.Ананд, О.Энхбаатар, Э.Дөлгөөн, Г.Дөлгөөн, Ц.Отгонжаргал нарын зургаан хүний бүрэлдэхүүнтэй бөгөөд Канадын мэргэжлийн дасгалжуулагч Steve Sir болон Г.Цэнгүүнбаяр нарын удирдлага дор бэлтгэл хийж байна. Тэд 2024 оны Азийн аваргаас хүрэл медаль хүртсэн бөгөөд өмнө нь 2018 онд дэлхийн шилдэг найман багийн тоонд багтаж байсан амжилтаа энэ удаа ахиулах зорилготой байгаа ажээ.
Монголын үзэгч, сагсан бөмбөг сонирхогчдын хувьд 10 хоногийн турш Улаанбаатар хот олон улсын спортын төв цэг болж, дэлхийн шилдгүүдийг гэрийнхээ гадаа угтах боломж бүрдэж байна. Сүхбаатарын талбайд болох тоглолтууд чөлөөт нэвтрэлтэй байх тул сагсан бөмбөгт дуртай хүн бүрийг шигшээ багаа дэмжихийг уриалж байна.
2 комментария
Ямар гоё мэдээ вэ! Монголыг дэлхий дахин илүү их танина гэж найдаж байна
Спортын хөгжил ингэж л эхэлдэг, үнэхээр бахархаж байна