Монголын үндэсний харваачдын холбооноос зохион байгуулсан 2025 оны эрэгтэй, эмэгтэй багийн улсын аварга шалгаруулах тэмцээн амжилттай болж өндөрлөлөө. Тус тэмцээнд улс даяархи аймаг, дүүргүүдээс нийт 47 эрэгтэй, 36 эмэгтэй баг оролцож, цэц мэргэнээ сорин өрсөлдсөн юм.
Эхний шатны хэсгийн болон шигшээ харваанууд зургадугаар сарын 7-8-нд Налайх дүүргийн “Өв-Эрдэнэ” багийн «Бүс нуур» зурхайд зохиогдсон бол медалийн төлөөх тоглолтууд Улаанбаатар хотын төв зурхайд болж аваргууд эцэслэн тодорлоо.
Эрэгтэй ангилалд Говь-Алтай аймгийн “Засагт Хан” клубын баг бусдыгаа ардаа орхин улсын аварга болов. Хоёрдугаар байрт Дорнод аймгийн Цагаан-Овоо сумын “Хасбуу” ҮСХ шалгарсан бол Баян-Өлгий аймгийн “Өлгийн мэргэчүүд” гуравдугаар байрт орсон байна. Дөрөвдүгээр байрт Ховд аймгийн “Уулсын мэргэчүүд” ҮСХХ, тавдугаар байрт мөн Говь-Алтай аймгийн “Хантайшир” клубын баг эрэмбэлэгджээ.
Эмэгтэй багийн ангилалд Хэнтий аймгийн “Сэцэн хааны мэргэд” ХНХ аваргын алтан медалийн эзэн боллоо. Дэд байрт Говь-Алтай аймгийн “Засагт Хан” клуб шалгарсан бол гуравдугаар байрыг Өмнөговь аймгийн шигшээ 1-р баг эзэлсэн байна. Багануур дүүргийн шигшээ баг дөрөвдүгээр байрт, Завхан аймгийн шигшээ баг тавдугаар байрт шалгарлаа.
Үндэсний харвааны энэхүү нэр хүндтэй тэмцээн нь өв соёлыг түгээн дэлгэрүүлэх, харваачдын ур чадварыг сорин хөгжүүлэх зорилготой бөгөөд жил бүрийн өрсөлдөөн улам ширүүсэж байгааг энэ удаагийн оролцогчдын тоо болон багуудын өрсөлдөөн батлан харууллаа.
