Тулгар төрийн 2234, Их Монгол Улсын 819, Үндэсний эрх чөлөө, тусгаар тогтнолоо сэргээн мандуулсны 114, Ардын хувьсгалын 104 жилийн ойг тэмдэглэх Үндэсний их баяр наадмыг зохион байгуулах бэлтгэл ажил албан ёсоор эхэллээ. Энэ хүрээнд наадмын нээлт, хаалтын ёслолыг хариуцан зохион байгуулах ажлын хэсгийн эхний хуралдаан зохион байгуулагдсан байна.
2025 оны баяр наадмын нээлт, хаалтын ерөнхий найруулагчаар Төрийн соёрхолт, Урлагийн гавьяат зүтгэлтэн Н.Наранбаатар ажиллаж байгаа бөгөөд тэрбээр өмнөх жилүүдэд ч энэхүү түүхэн арга хэмжээний найруулга, бүтээлд оролцож байсан туршлагатай найруулагч юм.
Жил бүр уламжлал болгон тэмдэглэдэг Үндэсний их баяр наадам нь монгол түмний үндэсний нэгдэл, тусгаар тогтнолын илэрхийлэл төдийгүй дэлхий дахинаа Монголын өв, соёл, түүхийг сурталчлах үнэт боломж болдог. Тиймээс наадмын нээлт, хаалтын ажиллагааг гадаад, дотоодын үзэгчдэд хүртээмжтэй, шинэ технологи, тайзны шийдлээр баяжуулах зорилт тавигдаад байна.
Энэ жилийн хувьд нээлтийн үйл ажиллагааг 360 градусын тайзны зохион байгуулалттайгаар хийхээр төлөвлөсөн бөгөөд наадмын үеэр жуулчдад зориулсан тусгай хөтөлбөр, үдэшлэг, энтертайнмент арга хэмжээнүүдийг нэмж зохион байгуулах тухай мэдээллийг холбогдох албаныхан өгчээ.
Үндэсний баяр наадмын бүтээлч хэсэг болох тайз, зохиолын зураглал, ерөнхий зохион байгуулалт зэрэг үндсэн төлөвлөгөөг боловсруулж эхэлсэн бөгөөд зохион байгуулалтын шат дараалсан үйл ажиллагаанууд үргэлжилж байна.
