Балтийн тэнгист байрлах ОХУ-ын газрын тос экспортын гол зангилааны нэг Усть-Луга боомтод Украин дахин цохилт өгсөн талаар мэдээллээ. Ингэснээр тус боомт долоо хоногийн дотор дөрөв дэх удаагаа халдлагад өртөөд байна.
Боомт байрладаг Ленинград мужийн захирагч Александр Дрожденко Телеграм хуудсандаа “Усть-Луга боомтод дэд бүтцийн хохирол учирсан” гэж мэдэгджээ. Тэрбээр мөн шөнийн цагаар Ленинград мужийн агаарын хилд нэвтэрсэн Украины хэд хэдэн дроныг устгасан гэж мэдээлсэн байна.
Сүүлийн үед Украин ОХУ-ын газрын тосны экспортын дэд бүтцэд чиглэсэн довтолгоогоо эрчимжүүлээд байгаа юм. Үүнд дараах хүчин зүйлс нөлөөлж байна:
- Ираны дайны улмаас газрын тосны үнэ өссөн
- АНУ ОХУ-д тавьсан газрын тосны хоригоо түр хугацаагаар цуцалсан
- ОХУ-ын эрчим хүчний экспортын орлого нэмэгдэх нөхцөл бүрдсэн
Энэ нөхцөл байдлын улмаас Киев Оросын газрын тосны орлогыг сааруулах зорилгоор Усть-Луга болон ойролцоох Приморск боомтод гуравдугаар сарын сүүлээс хойш удаа дараа цохилт өгчээ. Гуравдугаар сард “Reuters” агентлагийн мэдээлснээр, Украины довтолгооны улмаас ОХУ-ын газрын тосны экспортын хүчин чадал 40 хувиар буурсан байна.
Украины Ерөнхийлөгч Володимир Зеленский даваа гарагт /2026.03.30/ мэдэгдэл хийхдээ зарим холбоотон улс нь ОХУ-ын газрын тосны дэд бүтцэд цохилт өгөхөөс татгалзахыг хүссэн талаар дурдсан юм.
Эх сурвалж: The Moscow Times
