Монгол Улсын Ерөнхийлөгч У.Хүрэлсүх ОХУ-ын Ерөнхийлөгч В.В.Путины урилгаар Москва хотноо 2025 оны 05 дугаар сарын 09-ний өдөр болох Аугаа их Эх орны дайны ялалтын 80 жилийн ойн баярт оролцохоор хүрэлцэн ирнэ.
Өнөөдөр ОХУ-ын РИА агентлагаас мэдээлснээр, “ОХУ-ын Ерөнхийлөгч Владимир Путин 2025 оны тавдугаар сарын 7-нд Монголын Ерөнхийлөгч У.Хүрэлсүхтэй уулзаж, хоёр улсын харилцааны үндсэн чиглэлүүдийн талаар ярилцах юм” гэжээ.
Ерөнхийлөгч У.Хүрэлсүх 05 дугаар сарын 09-ний өдөр Улаан талбайд болох Ялалтын баярын ёслолд бусад улсын төрийн тэргүүн, өндөр дээд албан тушаалтнуудтай хамт оролцож, Александровын цэцэрлэгт байрлах “Нэр нь үл мэдэгдэх цэргийн хөшөө”-нд цэцэг өргөнө. Мөн Москва хотын Хүндэтгэлийн дэнж дэх Ялалтын цэцэрлэгт хүрээлэнд байрлуулсан “Ялалтад тэмүүлсэн морьд” хөшөөнд цэцэг өргөж, БНМАУ-ын баатар болон Хөдөлмөрийн баатар цол хүртсэн ЗХУ, ОХУ-ын иргэдийн төлөөлөлтэй уулзахаар төлөвлөж байна.
