Монголын орчин үеийн урлагийн дэмжигч холбоо энэ удаа илүү өргөн хүрээг хамарсан, олон улсын хэмжээний XAOS Festival 2025-ыг “ХУВИРАЛ” сэдвээр зохион байгуулахад бэлтгэлээ базаажээ. Энэ фестиваль 2025 оны 10-р сарын 10-наас 30-ны хооронд Улаанбаатарын таван өөр газарт болох бөгөөд амьд хөгжим, электрон тоглолт, үзэсгэлэн, илтгэл хэлэлцүүлэг зэрэг найман төрлийн үйл ажиллагааг багтаасан өргөн цар хүрээтэй хөтөлбөрөөр уран бүтээлчид, үзэгчдийг угтах болно. Фестивалийн хүрээнд гурван үзэсгэлэн, хоёр амьд болон электрон тоглолт зохион байгуулагдана. Эдгээр арга хэмжээ нь орчин үеийн урлаг, технологи, гэрэлтүүлэг, дуу авиа, дүрслэх урлагийн холбоосыг судлан, үзэгчдэд шинэлэг мэдрэмж, олон талт туршлагыг нэг дор өгөх зорилготой юм.
“Хувирал” сэдэв нь өөрчлөлт, эмх замбараагүй байдлаас шинэ дэг журам, гоо зүйн илэрхийлэл төрдөг хаосын үзлийг урлагийн хэлбэрээр харуулахыг эрмэлзэж байна. Тиймээс XAOS Festival 2025 нь технологи, соёл, философийн уулзвар дээр бий болсон орчин үеийн уран бүтээлийн ертөнцөөр дамжуулан үзэгчдийг дотоод сэтгэл, мэдрэхүйн түвшинд хувирал, дэвшлийн утга учрыг шинээр ойлгуулах аялалд урьж байгаа юм. Энэхүү фестиваль нь уран бүтээлчдийн шинэ санааг дэмжихээс гадна үзэгчдэд өөрчлөлтийн гүн утгыг мэдрүүлэх платформ болно.
Экспериментал тоглолтуудын хөтөлбөр:
- 10-р сарын 11: LIHLA, DIS FIG & HÜMA UTKU — Цахилгаан дуу авиа, экспериментал хөгжим, визуал элементүүдээр дүүрэн эрч хүчтэй эхлэл.
- 10-р сарын 25: 2K88 & RAINY MILLER — Клубын хэв маяг, электроакустик холимог, дотоод мэдрэмжийн уран тоглолтууд.
Байршил: On’n Off Production. Эдгээр тоглолтууд нь зөөлөн эмзэг хэмнэлээс хүчирхэг урсгал руу шилжих замаар дотоод сэрэл, хувьсал өөрчлөлтийг хамгийн гүнзгий түвшинд хүргэх зорилготой. Тоглолт бүр үзэгчдийг өөр ертөнцөд авчрах уран бүтээлийн туршлага байх болно. Иймээс фестивалийн хөгжмийн хэсэг нь зөвхөн сонсохоос илүүтэйгээр мэдрэх, хувирах үйл явцыг илэрхийлнэ.
Үзэсгэлэн, орон зайн уран бүтээлүүдийн жагсаалт:
- 10-р сарын 10–20: СОНО — Яруу найрагч, зохиолч Л. Өлзийтөгсийн “Сонотой гэрлэсэн минь” өгүүллэгээс урган гарсан дуу авиа, гэрлийн инсталляци.
- 10-р сарын 10–30: АГШИН ЗУУР — Э. Жанцанхоролын орон зайн баримал, Carsten Nicolai / Alva Noto болон монгол хөөмэйчид (Н. Ашид, Х. Дамдин, А. Ундармаа, Д. Даваасүрэн) нартай хамтарсан дуу авиа, визуал туршлага.
- 10-р сарын 10–30: БОДЛЫН ШУГУЙ — Э. Халиун, Suzana Benesova, X Ariaz нартай хамтарсан орон зайн баримал, дуу авиан уран бүтээлүүд.
- 10-р сарын 19–30: НҮД СОХЛОМ ХУРЦ ГЭРЭЛ БА СҮҮДЭР ДЭХ ТАВ ТУХ — Hüma Utku & Marco Ciceri нартай хамтарсан дуу авиа, видео, гэрлийн инсталляци.
Байршлууд: Black Box Theatre, Хаан Галерей, XO Art Space, B Contemporary. Эдгээр үзэсгэлэнгүүд нь технологи, гэрэлтүүлэг, орон зайн сэтгэлгээ, дуу авиагаар дамжуулан шинэ туршлагыг үзэгчдэд хүргэх болно. Тэдгээр нь зөвхөн харах биш, мэдрэх, хувирах үйл явцыг илэрхийлэх платформ болж, орчин үеийн урлагийн шинэлэг талыг нээх юм.
Олон улсын хамтын ажиллагаа XAOS 2025-ын амьд тоглолтонд Австралийн LIHLA, АНУ-ын Dis Fig, Туркийн Hüma Utku, Польшийн 2K88, Английн Rainy Miller нар оролцож байна. Үзэсгэлэнд Италийн медиа уран бүтээлч Marco Ciceri, Hüma Utku-гийн аудио визуал бүтээлүүд, Монголын Э.Жанцанхорол, Э.Халиун нартай хамт Словакын Suzana Benesova, Афганы X Ariaz, Германы Carsten Nicolai / Alva Noto, хөөмэйч Н.Ашид, А.Ундармаа, Д.Дамдин, Д.Даваасүрэн нар оролцож байгаа нь олон талт, өвөрмөц уран бүтээлийн онцлогийг нээх боломжийг өгч байна. Энэ фестиваль нь Монголын залуу экспериментал урлаг сонирхогчдыг уриалан, шинэ санааг тэлэх, олон улсын технологи, аудиовизуал бүтээлийг нутагшуулах, орчин үеийн урлагийн уламжлал ба шинэчлэлийг уялдуулах, Монгол уран бүтээлчдийг олон улсын сүлжээнд холбох зорилготойгоор хоёр дахь удаагаа зохиогдох гэж байна.
Энэ бол өөрчлөлтийн яруу, эмзэг уур амьсгалтай орон зай юм. Дуу, дүрслэл, үгсийн хязгааргүй хувирал дунд бүх зүйл боломжтой мэт мэдрэгдэх энэ фестиваль нь үйл явдал, үзэгдэл, үүслийн нийлмэл илэрхийлэл болно. Энд байх нь өөрөө нэгэн хувирал болж хувирна. Тасалбарыг Shoppy.mn сайтаар худалдаалж байна.
Холбоо барих:
- Фэйсбүүк: https://www.facebook.com/Xaosfestival
- Instagram: https://www.instagram.com/xaosfestival/
- Веб: https://mcasa-mongolia.com/?page_id=3775
