Японы Тоттори мужийн захирагч Шинжи Хираи бүс нутгийн парламентын чуулганы үеэр Токио хотын захирагч Юрико Коикэ-г “оба-сан” (дунд эргэм насны эмэгтэй буюу манайхаар “авгай”, “эгчүүхэй”) хэмээн нэрлэсэн нь томоохон дуулиан дагуулаад байна.
Kyodo агентлаг болон Medee.news-ийн мэдээлснээр, энэхүү таагүй үйл явдал 2026 оны 3-р сарын 18-ны өдрийн хуралдааны үеэр болжээ.
Хэрэг явдал хэрхэн өрнөв?
Хуралдааны үеэр нэгэн депутат төрөлтийг дэмжих бодлогын талаар асуулт асуухад Хираи хариулахдаа Токио хотын захиргаанаас хэрэгжүүлж буй арга хэмжээг жишээ болгон татжээ. Ингэхдээ тэрээр Токио хотын захирагчийг албан тушаалаар нь бус, япон хэлний “оба-сан” гэх албан бус, зарим тохиолдолд үл хүндэтгэсэн утга илэрхийлдэг үгээр нэрлэсэн байна.
“Оба-сан” (Oba-san): Энэ үг нь япон хэлээр “авга эгч” гэсэн утгатай ч, танихгүй эсвэл албаны хүнд хандаж хэлэхэд “дунд эргэм насны авгай” гэсэн басамжилсан, үл хүндэтгэсэн өнгө аястай болдог байна.
Парламентын хариу үйлдэл
Захирагчийн энэ үйлдэлд бусад парламентачдын зүгээс дургүйцлээ илэрхийлжээ. Нэгэн гишүүн Хираигийн хэлсэн үг ёс зүйгүй бөгөөд албан ёсны протоколд байх ёсгүй гэж үзэн, хурлын тэмдэглэлээс хасах хүсэлтийг даргын зөвлөлд гаргасан байна.
Тоттори мужийн парламентын хэрэг эрхлэх газраас Хираи захирагч үнэхээр Коикэ-г “эгчүүхэй/авгай” гэж нэрлэснийг баталсан юм. Одоогоор Хираи Токио хотын захирагчаас албан ёсоор уучлалт гуйсан эсэх нь тодорхойгүй байна.
Япон шиг албаны ёс зүй, эрэмбэ дарааг чанд баримталдаг улсад ийм үйлдэл нь эмэгтэйчүүдийг ялгаварлан гадуурхсан, улс төрийн соёлгүй үйлдэл гэж хүчтэй шүүмжлүүлж байгаа юм.
