Table of Contents
Нийслэлийн Хан-Уул дүүргийн 3-р хороонд байрлах МСМ компанийн автобусны буудлын орчимд энэ сарын 22-ны орой 20:30 цагийн үед ноцтой авто осол гарч, 50 настай эмэгтэй машинд дайруулсны улмаас биеийн байдал нь маш хүнд байна.
Ослын нөхцөл байдал
Осол “Prius” маркийн автомашины жолоочийн буруутай үйлдлээс үүдэлтэй гэж урьдчилсан байдлаар үзэж байгаа бөгөөд ослын улмаас хохирогч эмэгтэй Гэмтэл согог судлалын үндэсний төвийн (ГССҮТ) Сэхээн амьдруулах тасагт хүргэгдэн эмчлүүлж байгаа аж. Ар гэрийнхний мэдээлснээр түүний биеийн байдал нэн хүнд байгаа гэнэ.
Явган хүний зам устгаснаас болж осол гарчээ
Тухайн хэсэгт өмнө нь явган хүний зам байсан ч зам засварын компаниуд уг хэсгийг хуулж, автомашины зорчих хэсэг болгон өөрчилсөн байжээ. Үүнээс үүдэн явган зорчигчид авто замаар зорчихоос өөр сонголтгүй болсон байна.
Хяналтын камер дутмаг, мөрдөн шалгах ажиллагаа хүндрэлтэй байна
Осол гарсан газарт хяналтын камер байхгүй тул хэргийн нарийн нөхцөл байдлыг тогтоох, жолоочийн буруутай эсэхийг тодорхойлоход хүндрэл үүсчээ. Хохирогчийн ар гэрийнхэн “энэ ослыг харсан гэрч байвал болон хар хайрцагтаа ослын бичлэгтэй жолооч нар байвал холбогдохыг” уриалсан байна.
Тэд мөн явган зорчигчийн аюулгүй байдлыг хангах үүднээс хуулсан замыг сэргээн байгуулах, зохицуулалт хийх шаардлагатай гэдгийг онцолжээ.
