Азийн Хөгжлийн Банк (АХБ)-наас “Азийн хөгжлийн төлөв” хэмээх эдийн засгийн шинэчилсэн тайлангаа өчигдөр нийтэлжээ. Тус тайланд Монгол Улсын эдийн засгийн төлөв, хэтийн чиг хандлагыг онцлон дурдсан байна.
АХБ-ны Ахлах эдийн засагч З.Мөнх-Оргил тайланд дүн шинжилгээ хийж, “Монгол Улсын эдийн засгийн ирээдүйг эерэг гэж харж байгаа” хэмээн мэдэгдлээ. Тэрбээр, 2023 онд Дотоодын нийт бүтээгдэхүүний өсөлт 7.4 хувьтай байсан бол 2024 онд 4.9 хувьд хүрсэн нь хөдөө аж ахуйн салбарын бууралтаас үүдэлтэй гэж тайлбарлав.
З.Мөнх-Оргилын онцолсноор, хэрэв зудын нөлөө үзээгүй байсан бол 2024 оны өсөлт өмнөх жилийн түвшинд хүрэх боломжтой байжээ. Үндэслэлтэй тооцооллоор үзэхэд, Монголын эдийн засгийн өсөлт 2025 онд 6.6 хувь, 2026 онд 5.9 хувьтай байх төлөв гарсан байна. Үүнд уул уурхай, үйлчилгээний салбарууд тэргүүлэн, Оюутолгойн гүний уурхайн олборлолтын нэмэгдэл нөлөө ихээхэн үүрэг гүйцэтгэх аж.
Харин инфляцын түвшин 2025 онд 9.1 хувь, 2026 онд 7 хувьтай байх төлөвтэй байгааг мөн дурдсан. Энэ нь өндөр инфляц үргэлжлэх хандлагатайг илтгэж байна.
Эдийн засгийн өсөлтийг өөдрөгөөр төсөөлж буй ч тодорхой эрсдлүүдийг үгүйсгэхгүй гэж АХБ-ны тайланд дурдсан. Үүнд:
- Түүхий эдийн үнийн уналт
- Инфляцын дарамт
- Олон улсын худалдааны зөрчил, хязгаарлалт
зэрэг нь сөргөөр нөлөөлөх хүчин зүйлс байж болзошгүй юм.
