Хадгаламж зээлийн хоршооны хохирогчид УИХ-ын гишүүн Ж.Баярмаад хандсан албан шаардлага гаргаснаа олон нийтэд мэдээллээ. Тэдний зүгээс гишүүний төрсөн ах Ж.Мэндбаярын удирдаж байсан “Глоб Кредит” ХЗХ-той холбоотой хохирлыг анхаарч, асуудал шийдвэрлэх тал дээр ямар ч байр суурь илэрхийлэхгүй байгаад гомдолтой байгаагаа илэрхийлж байна.
Хохирогчдын байр суурь
Хадгаламж зээлийн хоршоонд хохирогчдын эрх ашгийг хамгаалах төвийн тэргүүн Х.Оюунцэцэг:
“19 жилийн турш 5290 хүн нийт 25.8 тэрбум төгрөгөө авч чадаагүй. Судалгаагаар 800 гаруй хүнээс 40-50 хүн нь нас барсан байна. Зарим нь мөнгөний гачигдлаас болж гэр бүл салж, цус харваж, амь насаа алдсан. Энэ бол XXI зууны хамгийн эмгэнэлтэй гэмт хэрэг юм.”
Тэрбээр “Глоб Кредит”, “Бүтээн байгуулалт хөгжлийн сан”, “Баян-Өндөр сан”, “Гэр хорооллын барилгажилт” зэрэг ХЗХ-дыг хамгийн их хохирол учруулсан гэж нэрлээд, тэдгээрийн удирдлагуудын хариуцлагагүй байдал олон мянган иргэний амьдралыг бусниулсан гэж мэдэгдэв.
Гомдлын гол шалтгаан – Гишүүний хандлага
Х.Оюунцэцэг цааш нь хэлэхдээ:
“Гишүүн болоод 10 сар болж байгаа Ж.Баярмаа хохирсон иргэдийн асуудалд нэг ч удаа дуугараагүй. Харин төрийн бодлогыг шүүмжилж, ‘Надаас уучлалт гуй’ гэх мэт мэдэгдэл хийж байна. Ард түмэн ядуу байгаа гэдэг бол үнэн. Гэхдээ үүнийг ярихын оронд өөрийн ахын нэртэй холбоотой ХЗХ-ны хохирогчдын асуудлыг яагаад ярьж болохгүй гэж? Энэ бол хоёр нүүр гаргасан байдал.”
Мөн тэрбээр “Засгийн газрыг бойкотлохоос илүүтэйгээр, төрсөн ахынхаа хохироосон иргэдийн төлөө дуугар” хэмээн уриалжээ.
Эцсийн шаардлага
“Ж.Баярмаа гишүүн хохирсон иргэдийн өмнөөс дуугарахын оронд ‘Надаас уучлалт гуй’ гэж шаардаж байна. Гэтэл ийм эрх түүнд байхгүй. Тиймээс бид хохирлыг барагдуулах талаар бодитой алхам хийхийг эцсийн удаа шаардаж байна” хэмээн Х.Оюунцэцэг мэдэгдэлдээ онцлов.
