Улсын Их Хурлын дарга С.Бямбацогт 2026 оны дөрөвдүгээр сарын 06-ны энэ өдөр парламентад төлөөлөлтэй таван намын удирдлагуудыг хүлээн авч, ажил хэргийн уулзалт хийлээ. Уг арга хэмжээнд Ерөнхий сайд бөгөөд МАН-ын дарга Н.Учрал, АН-ын дарга О.Цогтгэрэл, Үндэсний эвслийн тэргүүн Н.Номтойбаяр, ХҮН намын зөвлөлийн дарга П.Ганзориг болон ИЗНН-ын дарга Б.Батбаатар нар оролцож, хууль тогтоох байгууллагын шинэчлэлийн талаар санал солилцсон юм.
УИХ-ын дарга уулзалтын үеэр парламент бол үндсэндээ зөвшилцлийн талбар гэдгийг онцлоод, цаашид гарах томоохон бодлого, шийдвэр бүрд таван намын төлөөллийг тэгш оролцуулна гэдгээ илэрхийлэв. Дэлхий дахины геополитик, эдийн засгийн ээдрээтэй нөхцөлд улс орны язгуур эрх ашгийг нэгдүгээрт тавьж, парламентын засаглалыг бэхжүүлэхэд намуудын хамтын ажиллагаа нэн чухал байгааг тэрбээр тэмдэглэлээ.
Хамтын ажиллагааны хүрээнд дараах гол зорилтуудыг хэрэгжүүлэхээр талууд ярилцлаа:
- Парламентын үйл ажиллагааг мэдээллийн технологийн тусламжтайгаар илүү нээлттэй, ил тод болгох ажлыг эрчимжүүлэх.
- Улсын Их Хурлын тухай, Чуулганы хуралдааны дэгийн тухай болон Хяналт шалгалтын тухай хуулиудад нэмэлт, өөрчлөлт оруулах төслүүдийг ирэх долоо хоногт өргөн мэдүүлэх.
- Гишүүдийн ёс зүй, идэвх оролцоог сайжруулахын тулд хурал тасалдаг байдалд тодорхой хязгаарлалт, хариуцлага тогтоох.
- Улс орны нийтлэг эрх ашгийн төлөө намууд улс төржилтөөс ангид байж, зөвшилцлийн зарчмаар ажиллах.
Уулзалтад оролцсон намуудын удирдлагуудын зүгээс парламентын ардчиллыг шинэ шатанд гаргах, нийгэмд тулгамдсан асуудлуудыг хамтдаа шийдвэрлэх УИХ-ын даргын санаачилгыг бүрэн дэмжиж байгаагаа илэрхийллээ. Талууд цаашид нийгэм, эдийн засгийн хүрээнд тулгарч буй сорилтуудыг даван туулахын тулд нээлттэй хэлэлцүүлэг өрнүүлж, нэгдсэн байр суурьтай ажиллахаар тогтсон байна.
