Спортын Төв Ордон (СТО)-д 3х3 сагсан бөмбөгийн уур амьсгал үргэлжилж, тэмцээнүүд ар араасаа зохион байгуулагдсаар байна. Үндэсний Дээд лигийн эхний тэмцээн саяхан өндөрлөсөн бол үүний дараа олон улсын оролцоотой “FIBA 3×3 ULAANBAATAR SUPER QUEST 2026” энэ сарын 11-нээс 12-ныг дуустал болохоор товлогджээ.
Тус тэмцээнд амжилттай оролцсон шигшээд үлдэх хоёр баг БНХАУ-ын Чендү хотод зохион байгуулагдах Их Дуулгын эрх авах юм. Нийт 12 баг хүч сорих энэ удаагийн тэмцээнд Японы хоёр баг, мөн БНСУ, Малайз, Казахстаны төлөөллүүд өрсөлдөнө.
Монгол Улсаас оролцох багуудын нэг болох “Сэлэнгэ Бодонс” 3х3 баг бүрэлдэхүүнээ албан ёсоор танилцуулсан байна. Тус багийн бүрэлдэхүүнд Хойд Америкийн Үндэсний Сагсан Бөмбөгийн Лиг (NBA)-т тоглож явсан ДеМаркус Казинс, Жайден Скрабб, Б.Хурцбаатар, О.Тулга нар багтжээ.
Д.Казинсын хувьд 3х3 сагсан бөмбөгийн талбарт шинэ хүн биш юм. Тэрбээр өмнө нь БНХАУ-ын Үши хотын багт олон жил хүчин зүтгэсэн Андрю Келлигийн урилгаар тус багийн бүрэлдэхүүнд багтаж, Шанхайд болсон Их Дуулгад оролцож байсан туршлагатай.
Түүнчлэн тэр тэмцээний үеэр дөрвөн тоглолтод оролцохдоо 46 оноо авсан үзүүлэлттэй байв. Иймээс түүний энэ удаагийн оролцоо “Сэлэнгэ Бодонс”-ын бүрэлдэхүүнд анхаарал татах гол нэрсийн нэг болоод байна.
- “FIBA 3×3 ULAANBAATAR SUPER QUEST 2026” энэ сарын 11-нээс 12-ныг дуустал болно.
- Шигшээд шалгарсан хоёр баг БНХАУ-ын Чендү хотод болох Их Дуулгын эрх авна.
- “Сэлэнгэ Бодонс” багт ДеМаркус Казинс, Жайден Скрабб, Б.Хурцбаатар, О.Тулга нар багтжээ.
