“Эрдэнэ Ресурс Деволопмент” компани энэ оны есдүгээр сараас “Баян Хөндий” уурхайгаас албан ёсоор алт олборлож эхэлсэн бөгөөд он дуусах хүртэл сар бүр дунджаар 7,000 унц алт гаргах хүчин чадалд хүрэх зорилт тавиад байна. Үйл ажиллагаа нь Монголиан Майнинг Корпорацитай 50:50 хамтарсан хөрөнгө оруулалтын гэрээний хүрээнд хэрэгжиж байгаа бөгөөд 2026 оны дунд үе гэхэд 110 сая ам.долларын өрөө барагдуулж, өргөтгөлийн санхүүжилтийн боломжоо баталгаажуулахаар төлөвлөжээ.
Шууд хэрэгжүүлэх боломжит өргөтгөлүүд:
- “Баян Хөндий” уурхайн ил уурхайг 150,000 унцаар нэмэгдүүлэх
- Өндөр агуулгатай 50,000 унц алт бүхий “Dark Horse” ордыг ашиглалтад оруулах
Эдгээр нь одоо ашиглаж буй дэд бүтэц болон боловсруулах хүчин чадлыг илүү үр ашигтай болгох боломжийг бүрдүүлнэ.
Бүс нутгийн хөрөнгө оруулалтын багц ба зах зээлийн нөхцөл
Компанийн багцад 500,000 унц алтны эквивалент нөөцтэй “Алтан Нар” орд болон стратегийн ач холбогдолтой “Зүүн Мод” молибденийн орд багтсан нь хөрөнгө оруулалтын чадамжийг нэмэгдүүлж байна. 2026 онд 7 сая ам.долларын хайгуулын төсөв зарцуулах бөгөөд энэ нь үйлдвэрлэлийг жилдээ 200,000–250,000 унц хүргэх боломжтой гэж тооцож байгаа юм.
Компанийн Ерөнхийлөгч, Гүйцэтгэх захирал Питер Акерли:
“Бид төлөвлөгөөгөө анхнаас нь тодорхой болгосон. Хэдхэн сарын дотор бүтэн хүчин чадалд хүрч, он дуусахаас өмнө сар бүр дунджаар 7,000 унц алт, ойролцоогоор тонн тутамд 4 гр агуулгатай хүдэр боловсруулна” гэж мэдэгджээ.
Тэрээр мөн “Баян Хөндий үнэхээр онцгой. Бараг сульфид агуулаагүй, алт мөнгөний багахан дагалдах эрдэсжилттэй. Металл авалт нь уламжлалт бутлах, нунтаглах, уусгах аргаар 93–95 хувьд хүрч байна” хэмээн онцолсон байна.
Өнөөгийн алтны өсөлттэй үнэ, тогтвортой санхүүгийн бүтэц нь “Эрдэнэ Ресурс”-ыг хөгжүүлэгчээс үйлдвэрлэгчийн шатанд шилжиж, хөрөнгө оруулагчдад бодит мөнгөн урсгал болон хайгуулын өргөн боломжийг зэрэгцүүлэн олгож буйг харуулж байна.
