Энэтхэгийн Жамму ба Кашмир мужид орших Чинаб голын дээгүүр баригдсан, дэлхийд хамгийн өндөрт тооцогдох төмөр замын гүүрийг өнгөрсөн долоо хоногт ёслол төгөлдөр нээлээ. Тус гүүрний нээлтийн арга хэмжээнд тус улсын Ерөнхий сайд Нарендра Моди биечлэн оролцож, зорчих хөдөлгөөнийг албан ёсоор эхлүүлэв.
Чинаб гүүрийн гол үзүүлэлтүүд:
- Өндөр: 359 метр (Эйфелийн цамхагаас 29 метр өндөр)
- Урт: 1315 метр
- Гулдан хэсэг: 467 метр
- Барилгын материал: Металл, бетон
- Ган ашиглалт: 28,660 тонн
- Ашиглалтын хугацаа: 120 жил
- Тэсвэртэй нөхцөл:
- 260 км/ц хурдтай салхи
- Хүчтэй газар хөдлөлт
- Тэсэлгээний аюул
- -20°C хүйтэн
Уг аварга байгууламжийг барихад дэлхийн хамгийн урт өргөгч кран ашиглагдсан нь инженерийн гайхамшигт шийдлүүдийн нэг болжээ. Барилгын ажилд Энэтхэгийн болон олон улсын 120 гаруй инженер хамтран оролцсон байна.
Ерөнхий сайд Нарендра Моди онцлохдоо:
“Чинаб гүүр нь Жамму ба Кашмир мужийг бусад бүс нутагтай төмөр замаар холбоод зогсохгүй эдийн засаг, зам, тээврийн дэд бүтэц, аялал жуулчлалын хөгжилд үнэтэй хувь нэмэр оруулна. Энэ бол энэтхэгчүүдийн эв нэгдэл, хүсэл тэмүүллийн илэрхийлэл” гэжээ.
Барилгын явцын саад ба шинэчлэл
Анх 2019 онд ашиглалтад оруулахаар төлөвлөгдсөн ч цар тахлын улмаас ажил саатаж, таван жилийн дараа ийнхүү албан ёсоор нээлтээ хийв. Хадан уулын хормойд байрласан уг гүүрийн бүтэц нь байгалийн хатуу ширүүн нөхцөлд тэсвэртэй байхаар бодож зохион бүтээгдсэн юм.
Энэхүү түүхэн бүтээн байгуулалт зөвхөн Энэтхэгийн инженерүүдийн ур чадварыг харуулсан төдийгүй тус улсын стратегийн бүс нутгийн дэд бүтцийг шинэ шатанд гаргаж буй томоохон алхам боллоо.
