Монгол Улсын гавьяат тамирчин, марафонч Б.Сэр-Од ирэх дөрөвдүгээр сарын 20-нд АНУ-д зохион байгуулагдах дэлхийн нэр хүндтэй долоон марафоны нэг (World Marathon Majors) болох Бостоны марафонд оролцохоор болжээ. Энэхүү түүхэн уралдаан энэ жил 130 дахь удаагаа зохион байгуулагдаж байгаа бөгөөд “Bank Of America”-гийн ивээн тэтгэлэг доор явагдах мэргэжлийн тамирчдын ангилалд манай тамирчин албан ёсоор нэмэгдсэнийг тус марафоны албан ёсны хуудсанд мэдээлсэн байна.
Ингэснээр Б.Сэр-Од нь Монгол Улсаас дэлхийн хамгийн нэр хүндтэй уралдааны элит ангилалд хурд сорихоор болсон анхны тамирчин болж, спортын түүхэнд шинэ хуудас нээж байгаа юм. Тэрбээр дэлхийн шилдэг гүйгчидтэй мөр зэрэгцэн эх орныхоо нэрийг гаргах хариуцлагатай даалгавар хүлээж байна.
Уралдааны цар хүрээ болон оролцогчдын статистик мэдээллийг сонирхвол:
- Дөрөвдүгээр сарын 2-ны байдлаар нийт 32,494 тамирчин бүртгүүлжээ.
- Оролцогчид АНУ-ын 50 муж болон дэлхийн 137 орныг төлөөлөн ирэх аж.
- Зохион байгуулагч Массачусеттс мужаас 4,698 иргэн оролцохоор нэрээ өгсөн байна.
Марафоны үеэр уламжлал болгон зохион байгуулдаг хандивын арга хэмжээгээр өнгөрсөн жил 50.4 сая ам.доллар цугларсан бол энэ жил уг дээд амжилтыг эвдэхийг зорьж байгаагаа зохион байгуулагчид онцоллоо. Тус уралдаанд түрүүлсэн шилдэг тамирчин 50,000 ам.долларын мөнгөн шагнал хүртэх бөгөөд энэ нь мэргэжлийн гүйгчдийн хувьд томоохон урамшуулал болох юм.
