Өнөөдөр Сэлэнгэ аймгийн Зүүнбүрэн, Цагааннуур сум, Хэнтий аймгийн Батширээт сумдын нутаг дэвсгэрт ой, хээрийн гурван удаагийн түймэр гарч, Онцгой байдлын байгууллагын алба хаагчид түймрийг унтраахаар шуурхай ажиллаж байна.
Хэнтий аймгийн Батширээт суманд гарсан хээрийн түймрийг богино хугацаанд бүрэн унтраасан бол Сэлэнгэ аймгийн хоёр суманд гарсан ой, хээрийн түймэрт олон арван алба хаагч оролцож, гал түймрийг хяналтад авахаар үргэлжлүүлэн ажиллаж байгаа талаар Онцгой байдлын ерөнхий газраас мэдээлэв.
Түүнчлэн нийслэлийн зургаан дүүрэгт нийт 11 удаагийн шар өвсний гал түймэр бүртгэгдсэн байна. Тухайлбал:
Баянзүрх, Сонгинохайрхан, Чингэлтэй, Сүхбаатар, Баянгол, Хан-Уул дүүргүүдэд гарсан түймрүүдийн ихэнхийг бүрэн унтраажээ.
11 гал түймрийн 10-ыг бүрэн унтраасан бол,
Хан-Уул дүүргийн 11-р хорооны нутагт, Богдхан уулын оройн хэсэгт гарсан шар өвсний гал түймрийг унтраахаар одоо ч алба хаагчид ажиллаж байна.
Шар өвсний түймэр хаврын хуурай улиралд хурдан тархаж, байгаль орчинд асар их хохирол учруулах эрсдэлтэй байдаг. Иймд иргэдийг ил задгай гал түлэхгүй байх, хяналтгүй гал алдах эрсдэлээс сэргийлэхийг албаныхан анхаарууллаа.
Онцгой байдлын байгууллагаас нэмж мэдээлснээр, цаг агаарын хуурайшилтын улмаас ой, хээрийн түймрийн эрсдэл өндөр хэвээр байгаа тул иргэд, аж ахуйн нэгжүүд анхаарал сэрэмжээ өндөрсгөх шаардлагатай байна. Мөн гарсан түймрүүдэд түргэн шуурхай ажиллаж буй алба хаагчдад зориулан нэмэлт хүч, техник хэрэгсэл гаргаж, дэмжлэг үзүүлж байгаа аж.
