АНУ-ын Ерөнхийлөгч Дональд Трамп өмнө нь түүнийг дэмждэг байсан ч Ирантай дайн хийхийг эсэргүүцэж буй консерватив үзэлтэй хэд хэдэн хөтлөгч болон подкастеруудыг хатуу шүүмжиллээ. Энэ тухай мэдээллийн эх сурвалж нь Дональд Трамп өөрөө юм.
Трамп өөрийн Truth Social сүлжээнд нийтэлсэн постондоо Такер Карлсон, Мегин Келли, Кендис Оуэнс болон Алекс Жонс нарыг Ираны дэглэмийн адилаар “IQ багатай” хүмүүс хэмээн тодорхойлсон байна.
“Тэд бол тэнэг хүмүүс, тэд үүнийгээ мэднэ, гэр бүл нь ч мэднэ, бүгд мэднэ! Тэдний өнгөрсөн түүх, хийсэн зүйлсийг нь хар. Тэдэнд байх ёстой чанар байхгүй, хэзээ ч байгаагүй! Тэднийг бүгдийг нь телевизээс хөөсөн, тэд нэвтрүүлгээ алдсан. Хэн ч тэднийг сонирхохоо больсон учраас одоо телевизээр урихаа ч болсон. Тэд бол хямдхан сурталчилгааны төлөө юу ч хэлэхээс буцахгүй галзуу үймээн дэгдээгчид” гэж Цагаан ордны тэргүүн бичжээ.
Трамп хөтлөгч бүр дээр тусгайлан зогсож, шүүмжлэлээ үргэлжлүүлсэн юм. Тухайлбал, Карлсоныг “шийдвэргүй тэнэг” (spineless idiot) гэж нэрлээд, түүнийг “коллежоо ч төгсөөгүй”, Fox News сувгаас халагдсанаасаа хойш өөрийгөө олж чадахгүй байгааг нь сануулжээ.
Түүнчлэн тэрээр Карлсоныг сайн сэтгэцийн эмчид хандах хэрэгтэй гээд, эсвэл Мегин Келли болон “галзуу” Кендис Оуэнс нараас зөвлөгөө авч болох юм гэж егөөдсөн байна. Оуэнсийн тухайд Трамп түүнийг Францын тэргүүн хатагтай Брижит Макроныг эрэгтэй хүн гэж гүтгэж байсныг нь дурдаад: “Миний бодлоор Францын тэргүүн хатагтай Кендисээс хамаагүй үзэсгэлэнтэй, харьцуулах ч юм биш!” гэжээ.
Харин Алекс Жонсыг Трамп “дэмий юм ярьдаг дампуурсан нөхөр” гэж тодорхойлов.
Эцэст нь Трамп эдгээр “мэргэжилтнүүдийг” бүтэлгүйчүүд гэж нэрлээд, тэд MAGA (Make America Great Again) хөдөлгөөнийх биш, харин уг хөдөлгөөнд зүгээр л наалдах гэж хичээж буй “хожигдогсод” хэмээн дүгнэсэн байна.
