Table of Contents
АНУ-ын Массачусетсийн их сургуулийн эрдэмтэд хавдрын эсрэг шинэ үеийн “супер вакцин”-ыг амжилттай туршсан талаар мэдээллээ. Шинэ вакцин нь нано бөөмийн технологид тулгуурладаг бөгөөд хулганад хийсэн туршилтаар меланома, нойр булчирхайн болон хөхний хорт хавдрын өсөлтийг бүрэн зогсоож чадсан байна.
Судалгаанд оролцсон хулгануудын
- 88% нь огт хавдаргүй үлдсэн,
- 80% нь меланомоос бүрэн хамгаалагдсан бол,
- энгийн вакцин авсан хулганууд 35 хоногоос дээш амьдраагүй байна.
Мөн вакцин нь уушгинд үсэрхийлэл (метастаз) үүсэхийг бүрэн зогсоосон нь онцгой үр дүн байв.
Вакцины шинэ бүтэц
Ердийн вакцин нь өвчний эсийн хэсгийг агуулсан антиген ба дархлааг идэвхжүүлэгч адъювант хоёрын хослол байдаг. Харин хавдрын вакцинд тохирох адъювант олоход хүндрэлтэй тул судлаачид хоёр төрлийн адъювант бүхий липидийн нано бөөмөөр “суперадъювант” бүтээжээ.
“Бид эдгээр нано бөөмийг дархлааны системийг олон чиглэлд идэвхжүүлэх зорилгоор зохион бүтээсэн. Хавдартай холбоотой антигенуудтай хослуулснаар хавдрын өсөлтийг эрс бууруулж чадсан,”
— хэмээн профессор Прабхани Атукорале хэлжээ.
Хоёр дахь шатны туршилт
Судалгааны хоёр дахь шатанд эрдэмтэд хавдрын эдээс шууд авсан үхсэн хавдрын эсийг ашиглаж, дархлааны хариу урвал үүсгэхийг зорьжээ. Үр дүн дараах байдалтай байв:
- Нойр булчирхайн хавдрын үед – 88%,
- Хөхний хавдрын үед – 75%,
- Меланомын үед – 69% амжилттайгаар хавдрын эсүүдийг устгаж чадсан.
Ямар ч хулганад хавдар бусад эрхтэнд тархаагүй байна.
Ирээдүйн боломж
Судалгааны хамтран зохиогч доктор Гриффин Кейн “Энэхүү вакцин нь хавдрын эсрэг тодорхой Т-эсийн хариу урвал үүсгэж байгаа нь урт настай байх гол хүчин зүйл” гэж онцолжээ.
Эрдэмтдийн үзэж буйгаар уг вакцин нь олон төрлийн хавдрын эсрэг ажиллах суурь платформ болж чадна. Хэрэв хүн дээрх клиникийн туршилт амжилттай болвол энэ нь бие дотор хавдрын тархалтыг бүрэн зогсоох анхны эмчилгээний нэг болох магадлалтай.
