Казахстан Улсын Ерөнхийлөгч Касым-Жомарт Токаев тусгай зарлиг гарган, нэр хүндтэй «Silk Way Star» олон улсын дууны шоуны ялагч, дуучин И.Мишээлийг “Найрамдлын II зэргийн одон”-гоор шагнаж, хүндэтгэл үзүүлэв. Түүнийг хөгжмийн урлагт гаргасан өндөр амжилт, мөн түүнчлэн улс орнуудын хоорондын соёлын харилцаа, найрамдлыг бэхжүүлэх үйлсэд оруулсан онцгой хувь нэмрийг нь үнэлэн уг одонг гардуулжээ.
И.Мишээл нь Казахстан Улсад гурван сарын турш үргэлжилсэн «Silk Way Star» тэмцээнд амжилттай оролцож, өөрийн ур чадвараа бүрэн харуулсан юм. Тэрээр Азербайжан, Армени, Гүрж, Казахстан, Хятад, Киргиз, Малайз, Монгол, Тажикистан, Туркменистан, Узбекистан, Өмнөд Солонгос зэрэг 12 орны шилдэг оролцогчдыг ардаа орхиж, тус шоуны Гран приг хүртсэн билээ. Энэ ялалт нь Монголын хөгжмийн урлагийг олон улсад таниулахад чухал үүрэг гүйцэтгэсэн.
«Silk Way Star» шоуны зорилго:
«Silk Way Star» төсөл нь Казахстаны Ерөнхийлөгчийн Телевиз, Радио Комплекс болон БНХАУ-ын China Media Group (CMG)–ийн хамтарсан бүтээл юм.
- Энэ шоу нь оролцогч улс орнуудын хоорондын соёлын солилцоо, эв нэгдлийг бэхжүүлэх гол зорилготой.
- Тэмцээнд оролцогчдод өөрийн улсын үндэсний дуулах уламжлал, өв соёлоо дэлхийд сурталчлах өргөн боломжийг олгосон юм.
