Өмнөд Солонгосын прокурорын байгууллагаас дэлхийн хэмжээний супер од, BTS хамтлагийн гишүүн Жонгүгийг удаа дараа мөрдөж, тайван байдлыг нь алдагдуулсан гадаад улсын иргэнд холбогдох хэргийг шүүхэд шилжүүлсэн талаарх мэдээллийг хүргэж байна.
Сөүл хотын Баруун дүүргийн прокурорын газраас BTS хамтлагийн гишүүн Жонгүгийг мөрдөж, хувийн орон зайд нь халдсан хэргээр Бразил улсын иргэн, 30 орчим насны эмэгтэйд яллах дүгнэлт үйлдсэнээ албан ёсоор мэдэгдлээ. Түүнийг БНСУ-ын “Мөрдөх гэмт хэргийг шийтгэх тухай хууль” болон бусдын эзэмшил газарт зөвшөөрөлгүй нэвтэрсэн гэх үндэслэлээр яллагдагчаар татсан байна.
Хэргийн нөхцөл байдлыг тодруулбал:
- Давтамж: Уг эмэгтэй өнгөрсөн оны 12 дугаар сараас энэ оны нэгдүгээр сарын хооронд Жонгүгийн Сөүл хотын Ёнсан дүүрэг дэх гэрт нь 20 орчим удаа очсон байна.
- Үйлдэл: Тэрээр одны гэрийн хаалганы хонхыг удаа дараа дарах, захидал үлдээх зэргээр мөрдөж мөшгөсөн үйлдэл гаргажээ.
- Хориг зөрчсөн байдал: Анх 12 дугаар сард баривчлагдаад суллагдахдаа Жонгүгийн гэрээс 100 метрийн зайд ойртохгүй байх шүүхийн шийдвэр сонссон ч уг хоригийг удаа дараа зөрчсөн тул цагдаагийн байгууллага хэргийг прокурорт шилжүүлсэн аж.
Сэжигтэн эмэгтэй байцаалтын явцад “Жонгүгт хайртай учраас ийм үйлдэл хийсэн” хэмээн мэдүүлсэн байна. Өмнөд Солонгост “Sasaeng” буюу одуудыг хэт мөрдөж мөшгөдөг шүтэн бишрэгчдийн асуудал хурцаар тавигддаг бөгөөд хууль хяналтын байгууллагууд сүүлийн жилүүдэд энэ төрлийн гэмт хэрэгт оноох ял шийтгэлийг чангатгасаар байгаа юм.
