20 настай Грейс Жеймисон шүршүүрт орохдоо контакт линзээ аваагүйгээс болж хараагаа алдаж, удаан хугацааны хүнд сорилтыг даван туулжээ. Тэрээр өөрт тохиолдсон харамсалтай түүхээ бусдад сургамж болгох үүднээс олон нийтийн сүлжээнд хуваалцаж буйг CNN агентлаг мэдээллээ.
Грейсийн ярьж буйгаар, тэрээр Доминиканы Бүгд Найрамдах Улсад амарч байхдаа олон хүний адилаар шүршүүрт орохдоо линзээ авалгүй ордог байжээ. Гэвч энэ нь түүний нүдийг усанд ихэвчлэн байдаг акантамеба (acanthamoeba — усанд амьдардаг бичил биетэн) хэмээх бичил биетний халдварт өртөх нөхцөлийг бүрдүүлсэн байна.
АНУ-д ирснээс нь хэдэн долоо хоногийн дараа халдварын шинж тэмдэг илэрч эхэлсэн ч нүдний эмч эхлээд оношийг буруу тогтоож, стеройд дусаалга бичиж өгчээ. Энэхүү эмчилгээ нь тус болохын оронд халдварыг улам хүндрүүлж, нөхцөл байдлыг дордуулсан байна.
Улмаар Жеймисон акантамебны кератит хэмээх өвчний улмаас хараагаа бүрэн алджээ. Тэрээр зөв онош тогтоогдож, зохих эмчилгээ эхлэх хүртэл бараг хоёр сарын турш юу ч харахгүй байсан юм. Халдварын улмаас нүдэнд үүссэн хүчтэй үрэвсэл ийнхүү хараанд нь ноцтой хохирол учруулжээ.
Одоо тэрээр баруун нүдээрээ харахгүй байгаа бөгөөд “Сорви нь миний хүүхэн харааг бүхэлд нь хаасан тул баруун нүдээрээ юу ч харахгүй байна. Зөвхөн бүрэлзсэн цагаан өнгө, гэрэл л мэдрэгдэж байна. Усанд байхдаа контакт линзээ хэзээ ч бүү зүүгээрэй!” хэмээн дагагчдадаа анхааруулсан байна.
Хэдийгээр халдварын үеэр хоёр нүд нь хараагүй болсон ч одоогийн эмчилгээний ачаар тодорхой хэмжээний үйл ажиллагаа нь сэргэжээ. Цаашид хараагаа сайжруулахын тулд хагалгаанд орж магадгүй байгаа аж.
