1912 онд Атлантын далайд сүйрсэн «Титаник» хөлөг онгоцонд амиа алдсан гэр бүлийн хосын цагийг Их Британийн дуудлага худалдаагаар 1.78 сая фунт стерлинг (ойролцоогоор 2.33 сая ам.доллар)-ын үнээр борлуулж, өмнөх рекордыг эвджээ.
Уг түүхэн үйл явдал Английн Уилтшир гүнлэгийн Дивайзис хотод байрлах «Генри Олдриж энд Сан» (Henry Aldridge and Son) дуудлага худалдааны ордонд болж, энэхүү үр дүнгээр батлагдсан байна.
Энэхүү Jules Jurgensen брэндийн алтан халаасны цаг нь Германд төрсөн, Америкийн томоохон их дэлгүүрийн сүлжээ Macy’s-ийн хамтран эзэмшигч, бизнес эрхлэгч Исидор Штраусын эд зүйл байжээ. Тэрээр эхнэр Идагийнхаа хамт хөлөг онгоцоор аялж байв.
Тус хөлөг онгоц мөсөн уул мөргөж эхлэх үед Исидор Штраус бусад зорчигчдын хувь заяаг хуваалцахыг хүсэж, аврах завь дахь өөрийн суудалдаа суухаас татгалзсан аж. Харин түүний гэргий Ида ч мөн 41 жил хамт амьдарсан ханьтайгаа үлдэхээр шийдэж, аврагдах боломжоос татгалзсан байна. Штраусын хос завь дахь суудлаа өөрсдийн үйлчлэгч бүсгүйдээ өгчээ.
Исидор, Ида Штраус хоёрын амьдралын сүүлийн мөчүүдийн түүх нь Жеймс Кэмероны 1997 оны «Титаник» кинонд багтсан бөгөөд тэднийг усаар дүүрч буй өрөөндөө хамтдаа сууж буйгаар дүрсэлсэн байдаг.
Удалгүй хайгуулын баг Исидор Штраусын цогцсыг түүний эд зүйлс, түүний дотор энэхүү цагтай нь хамт олжээ. Цагийг эцэст нь түүний өв залгамжлагчдад нь хүлээлгэн өгсөн байна. Харин Ида Штраусын цогцос олдоогүй.
Өмнөх дуудлага худалдааны рекорд
Өмнөх дээд амжилтыг мөн энэ дуудлага худалдааны ордон тогтоож байсан. Тодруулбал, 2024 оны арваннэгдүгээр сард «Титаник»-ийн 700 гаруй зорчигчийг аварсан «Карпатиа» хөлгийн ахмад Артур Ростроны цагийг 1.6 сая фунтээр (2 сая доллар) борлуулж байжээ.
«Титаник»-ийн анхны бөгөөд сүүлчийн аялал
«Титаник» хөлөг онгоц 1912 оны дөрөвдүгээр сарын 10-нд Саутхэмптон хотоос анхны бөгөөд сүүлчийнхээ аялалд гарсан юм. Дөрөвдүгээр сарын 14-ний шөнөөс 15-нд шилжих үед Хойд Атлантын далайд мөсөн уултай мөргөлдөж, 2 цаг 40 минутын дараа живсэн. Уг ослын улмаас 1500 орчим хүн амь үрэгдэж, 712 зорчигч болон багийн гишүүд аврагдаж чадсан билээ.
