Украины Ерөнхийлөгч Володимир Зеленский “BBC” агентлагт өгсөн ярилцлагынхаа үеэр олон улсын анхаарлыг татсан ноцтой мэдэгдэл хийлээ. Тэрээр ОХУ-ын түрэмгийллийг зөвхөн бүс нутгийн мөргөлдөөн бус, харин дэлхийн хэмжээний томоохон дайны эхлэл гэж тодорхойлсон байна.
Ярилцлагын гол агуулгыг тоймловол:
Дэлхийн III дайн: Зеленскийн үзэж буйгаар Владимир Путин дөрвөн жилийн өмнө Украинд халдсанаараа Дэлхийн III дайныг аль хэдийн эхлүүлсэн бөгөөд одоо зөвхөн түүнийг хэн, хэзээ зогсоох вэ гэдэг асуулт л үлдээд байгаа аж.
Түрэмгийллийн зорилго: ОХУ-ын зүгээс хийж буй энэхүү үйлдэл нь дэлхий даяарх хүмүүсийн аж төрөх хэв маяг, дэг журмыг өөрчлөх оролдлого бөгөөд Путин зөвхөн Украинаар хязгаарлагдахгүй гэдгийг тэрээр анхааруулав.
Энхийн хэлэлцээ ба газар нутгийн маргаан: Одоогоор хоёр улс АНУ-ын шахалтаар хэлэлцээ хийж байгаа ч газар нутгийн асуудал дээр санал зөрөлдөөн их байна. ОХУ Донбасс бүсийг бүхэлд нь шаардаж байгаа бол Украины тал газар нутгаасаа өгөхөөс эрс татгалзаж байгаа юм.
Зеленский хэлэхдээ, хэрэв Украинд буулт хийж дайныг зогсоовол ОХУ хоёр жилийн дотор зэвсэгт хүчнээ сэргээн, дараагийн улс руу довтлох эрсдэлтэйг онцолжээ. Тиймээс Украиныг хамгаалж, түрэмгийллийг зогсоох нь дэлхий дахины хувьд хамтын ялалт болно гэдгийг уриалсан байна.
