Монгол Улсын Засгийн газрын тэргүүн Н.Учрал “Монгол генералын өдөр”-ийг тохиолдуулан цэргийн дээд цолтнуудтай уулзаж, тэдний эх орныхоо аюулгүй байдлын төлөө байгуулсан гавьяа зүтгэлийг алдаршууллаа. Энэхүү баярын өдөр өнөөдөр тохиож буй бөгөөд төрийн цэргийн болон хууль сахиулах байгууллагууд үе үеийн генералуудаа хүлээн авч, хүндэтгэл үзүүлдэг уламжлал тогтсон билээ.
Генерал цолны түүх ба тоон үзүүлэлт
Түүх сөхвөл, 1944 оны дөрөвдүгээр сарын 28-ны өдөр БНМАУ-ын Сайд нарын Зөвлөлийн тогтоолоор анхны 11 хүнд генерал цол олгож байжээ. Улмаар 2004 оноос эхлэн энэ өдрийг “Монгол генералын өдөр” болгон албан ёсоор тэмдэглэх болсон юм. Өнгөрсөн 82 жилийн хугацаанд Монгол Улсын хэмжээнд нийт 240 эрхэм энэхүү цэргийн дээд цолыг хүртжээ. Үүнд:
- Маршал — 1
- Армийн генерал — 1
- Хурандаа генерал — 8
- Дэслэгч генерал — 23
- Хошууч генерал — 128
- Бригадын генерал — 79 төрөн гарсан байна.
Орчин цагийн шаардлага ба шинэчлэл
Уулзалтын үеэр Ерөнхий сайд Н.Учрал орчин үеийн аюулгүй байдлын салбарт техник, технологийн дэвшил болон хиймэл оюун ухааны оролцоо чухал болохыг онцлов. Тэрбээр хэлсэн үгэндээ:
“Техник, технологийн энэ цаг үе онолын мэдлэгээс гадна, хиймэл оюун, инновац, технологийн өндөр ур чадвар шаардаж байна. Иймд генерал цолны болзол шалгуур, түүнийг даах итгэл найдвар, нэр хүндийн хэмжүүрийг улам бүр өндөрсгөх шаардлага тавигдаж байна. Энэ бол хөгжлийн зүй тогтол юм. Цаг үе юу шаардана, тэр бүхэнд бид бэлэн байх учиртай”
хэмээн тэмдэглэсэн юм. Энэ нь цэргийн дээд цолтнуудын мэдлэг, чадварыг цаг үеийн хөгжилтэй нийцүүлэн улам бүр чангатгах шаардлагатайг сануулсан хэрэг байлаа.
