Казахстаны Астана хотноо үргэлжилж буй дэлхийн хэмжээний цахим спортын “Counter-Strike 2” төрлийн “PGL Astana 2025” тэмцээний хоёр дахь өдөр өндөрлөлөө. Шагналын нийт сан нь 1.2 сая ам.доллар бүхий тус тэмцээнд Монголын төлөөлөл болох “The MongolZ” баг урилгаар оролцож буй бөгөөд гурав дараалан ялалт байгуулж, Playoffs шат буюу шөвгийн наймд шалгарав.
Тэмцээнд 16 баг тойргийн системээр оролцож, тус бүр таван тоглолт хийх эрхтэй. Гурван тоглолтод түрүүлсэн багууд шөвгийн наймд дэвшиж, цааш хасагдах журмаар өрсөлдөх юм. “The MongolZ” баг өмнөх тоглолтуудад Бразилын FURIA, мөн MIBR багуудыг ялснаар хоёр хожилтой болоод байсан.
Гурав дахь буюу шийдвэрлэх тоглолтоо тэд өнгөрсөн оны дэлхийн аварга, Украины алдарт Natus Vincere (NaVi) багтай хийж, “best-of-3” форматаар өрсөлдөж 2:0 харьцаатай ялалт байгууллаа. Эхний “Inferno” газрын зурагт манай баг хамгаалагч талаас эхэлж 4:8 харьцаатай байраа сольсон ч, довтолгоонд илүү зохион байгуулалттай тоглосноор 13:11 оноотой ялжээ. Энэхүү газрын зурагт манай багийн AWPer буюу мэргэн буудагч 910 нийт 17 kill хийж багийн тоглолтыг тодорхойлсон.
Хоёр дахь “Mirage” газрын зурагт NaVi-ийн сонголтын дагуу тоглож, манай баг эхэндээ довтлох байрлалаас эхэлсэн ч хоёр үеэр тэргүүлж хамгаалалтад шилжмэгц довтолгоог зогсоож, мөн 13:11-ээр ялалт байгуулжээ. Улмаар “The MongolZ” баг гурав дараалан хожиж, шөвгийн наймд эрхээ авсан анхны багуудын нэг боллоо.
Одоогоор манай багийн дараагийн өрсөлдөгч тодроогүй байгаа бөгөөд тэмцээний тойргийн шат энэ долоо хоногийн Лхагва гарагт дуусна. Харин шөвгийн наймын тоглолтууд Баасан гарагт “Barys Arena”-д явагдана. Тэмцээний ялагч баг 400,000 ам.доллар, удаах байр эзэлсэн багууд 187,500, 150,000 болон 87,500 ам.долларын шагнал авах юм.
Францын “Team Vitality”, Саудын Арабын “Team Falcons”, Данийн “MOUZ” зэрэг багууд энэ удаагийн тэмцээнд оролцохгүй байгаа бол ОХУ-ын “Team Spirit” оролцож байгаа нь онцлогтой.
