Азийн шилдэг багуудын нэгт тооцогддог The MongolZ баг залуу, авьяастай тоглогчдыг цахим спортын CS2 академидаа албан ёсоор элсүүлж эхэллээ. Энэхүү академи нь ирээдүйн мэргэжлийн тамирчдыг бэлтгэх зорилготой бөгөөд элсэгчид үндсэн багийн тоглогчдоос шууд туршлага хуваалцан, зөвлөгөө авах боломжтой.
Багийн гол бүрэлдэхүүн болох Б.Гарьдмагнай (bLitz), М.Содбаяр (Techno4K), Б.Өсөхбаяр (910), Б.Аюуш (mzinho), М.Азбаяр (Senzu) нар олон улсын тэмцээнүүдэд амжилттай оролцсон туршлагаа залуу үеийн тамирчдад хуваалцахаар бэлэн байгаагаа илэрхийлжээ.
The MongolZ баг өнгөрсөн онд хэд хэдэн томоохон тэмцээнд түрүүлж, Perfect World Shanghai Major 2024 тэмцээний плейоффт шалгарсан амжилт үзүүлсэн. Valve-ын гаргасан дэлхийн чансаагаар тус баг өнөөдрийн байдлаар тавдугаар байрт бичигдэж байгаа бөгөөд нийт орлого нь 1.5 сая ам.долларт хүрээд байна.
Академид элсэх хүсэлтэй тоглогч дараах шалгуурыг хангасан байх шаардлагатай: 17 нас хүрээгүй байх, Faceit ELO оноо 2700-аас дээш байх, мөн VAC хориг тавиулж байгаагүй байх. Эдгээр шалгуурыг хангаж буй тоглогчид бүртгэлийн маягтыг бөглөх замаар элсэлтэд оролцох боломжтой.
The MongolZ Academy нь Монголын цахим спортын ирээдүй болсон залуусын авьяасыг хөгжүүлж, тэднийг мэргэжлийн түвшинд гаргах зорилготой шинэлэг хөтөлбөр бөгөөд цахим спортын салбарт бодит өөрчлөлт авчрах чухал алхам болж байна.
