Японы баруун өмнөд нутгийн Токара арлын гинжин бүс нутаг сүүлийн өдрүүдэд тасралтгүй газар хөдлөлтийн чичиргээнд нэрвэгдэж байна. Зургадугаар сарын 21-нээс хойш нийт 900 гаруй удаа чичирхийлэл мэдрэгдсэн бөгөөд оршин суугчид аюул заналхийлж болзошгүй нөхцөл байдлын улмаас гүнзгий айдастай, шөнийн цагаар ч амар тайван амрах боломжгүйд хүрчээ.
Тус бүсэд хамгийн олон чичирхийлэл бүртгэгдсэн өдөр нь зургадугаар сарын 23-нд тохиож, тухайн өдөр 183 удаа чичиргээ мэдрэгдсэн байна. Харин дараагийн хоёр өдөр чичиргээний тоо харьцангуй буурч, тус тус 15, 16 болжээ. Гэсэн ч сарын сүүлчийн өдрүүдэд, тухайлбал 28, 29-нд чичиргээ дахин өсөж, 34 болон 98 болсон нь нөхцөл байдал тогтворгүй байгааг харуулж байна.
Токарагийн арлууд нь өмнө нь ч газар хөдлөлтөөр ийнхүү олон удаа чичирч байсан түүхтэй. 2023 оны есдүгээр сард тус бүс нутагт 15 хоногийн хугацаанд нэг ба түүнээс дээш хүчтэй 346 чичиргээ бүртгэгдсэн бол 2021 оны арванхоёрдугаар сард 26 өдрийн турш нийт 308 удаа газар хөдөлж байжээ.
Энэхүү гинжин хэлхээ нь нийт 12 арлаас бүрддэг ба тэдгээрийн долоод нь оршин суугчид амьдардаг. Нийт хүн ам нь ойролцоогоор 700 орчим хүн бөгөөд олон чичиргээнээс болж иргэд сэтгэл түгшсэн, түргэн тусламж болон аюулгүй байдлын арга хэмжээг хүлээж буйгаа илэрхийлжээ.
Япон улс газар хөдлөлтийн идэвхтэй бүс болох Номхон далайн галын цагирагт байрладаг тул жил бүр дунджаар 1500 орчим газар хөдлөлтийн чичиргээ бүртгэгддэг. Энэ нь дэлхийн нийт газар хөдлөлтийн 18 хувийг эзэлдэг гэсэн тооцоог мэргэжилтнүүд дэвшүүлжээ. Хүн амын тоо 125 саяд хүрсэн энэ оронд байгалийн гамшигтай уялдсан бэлэн байдлыг хангах нь нэн тэргүүний асуудал хэвээр байна.
