Table of Contents
Азийн залуучуудын “Бахрейн-2025” наадам үргэлжилж байгаа бөгөөд Монголын жүдо бөхийн эмэгтэй тамирчид энэ өдөр амжилттай оролцож нэг мөнгө, нэг хүрэл медаль хүртлээ.
Б.Хулан мөнгөн медаль хүртэв
Эмэгтэйчүүдийн 40 кг-ын жинд зодоглосон тамирчин Б.Хулан Тажикистан болон Киргизстаны бөхчүүдийг вазари оноогоор ялснаар финалд шалгарчээ. Тэрбээр алтан медалийн төлөө Узбекистаны тамирчин Болтабаева Дилафрузтай хүч сорин, эн тэнцүү барилдсан ч даралтанд орж иппон үнэлгээгээр ялагдан, мөнгөн медаль хүртсэн байна.
Э.Тэмүгэн хүрэл медаль авлаа
Харин эмэгтэйчүүдийн 48 кг-ын жинд хүч үзсэн Э.Тэмүгэн Тажикистаны бөхийг иппон үнэлгээгээр ялж, Энэтхэгийн бөхөд ялагдсан ч дагах барилдаанд Йорданы бөхийг иппон үнэлгээгээр ялсан юм. Хүрэл медалийн төлөөх барилдаанд тэрбээр Узбекистаны Азамбекова Дианаг юүко үнэлгээгээр ялж, хүрэл медалийн эзэн боллоо.
Шагналт байрын эзэд
Мөн Монголын бөхчүүдээс:
- Эрэгтэйчүүдийн 60 кг-ын жинд Ж.Энхтөр,
- Эмэгтэйчүүдийн 44 кг-ын жинд Г.Цэлмүүн нар тус тус шагналт тавдугаар байр эзэлсэн байна.
Монголын жүдо бөхийн залуу тамирчдын хувьд энэ амжилт нь ирээдүйн олон улсын тэмцээнүүдэд өрсөлдөх өндөр итгэл, туршлага авчирч байгаа юм.
