Энэ сарын 26-ны лхагва гарагт “Бүгд Найрамдах Монгол Улс тунхагласны өдөр”-ийг тэмдэглэн, улс даяар бүх нийтээр амарна. Энэ өдөр нь Монголын шинэ үеийн түүхэнд онцгой байр суурь эзэлдэг бөгөөд төр, засаг, нийгмийн тогтолцооны суурь өөрчлөгдсөн өдрийг бэлгэддэг юм.
1924 оны арваннэгдүгээр сарын 26-нд Монгол Улс анхдугаар Үндсэн хуулиа баталж, Хаант засгаас Бүгд найрамдах хэлбэрийн төрд шилжсэн. Ингэснээр хамжлагат ёсыг халж, шинэчлэл, эрх зүй, төрийн байгууллын үндсэн зарчмуудыг хуульчилж, ардчилсан шинжтэй шинэ тогтолцооны эхлэлийг тавьсан түүхтэй. Анхны Үндсэн хуулиар Монголын газар нутаг, газрын хэвлийн баялаг, ой мод, ан амьтныг ард түмний өмч гэж зарлан тунхагласан нь чухал алхам байв.
Түүнчлэн уг Үндсэн хууль иргэдийн сонгох, сонгогдох эрхийг хуульчилж, эмэгтэй, эрэгтэй иргэдийг эрхийн хувьд тэгш гэж үзсэн нь Азийн бүс нутагт анхдагч тохиолдлуудын нэгд тооцогддог. Энэ нь Монгол Улсын хүний эрх, жендэрийн тэгш байдлыг хүлээн зөвшөөрч, хуульчилсан томоохон дэвшил байлаа.
“Бүгд найрамдах Улс тунхагласны өдөр”-ийг 2016 оноос эхлэн бүх нийтийн амралтын өдөр болгон хуульчилсан. Үүний дагуу энэ өдөр:
- Төрийн байгууллагууд
- Сургууль, цэцэрлэг
- Ихэнх аж ахуйн нэгж, албан байгууллага
ажиллахгүй, иргэд амардаг журамтай. Харин улсын хэмжээнд хүндэтгэлийн арга хэмжээ, цэцэг өргөх ёслол, эрдэм шинжилгээний хэлэлцүүлэг, сургалт, уралдаан, үзэсгэлэн зэрэг түүх, соёлоо түгээн дэлгэрүүлэх олон төрлийн үйл ажиллагааг зохион байгуулдаг уламжлалтай. Энэ нь нэгэн цагийн түүхэн шийдвэрийг эргэн санаж, үндэсний бахархлаа бататгах, ирээдүй хойчдоо түүхийн мэдлэг, ухамсрыг түгээх зорилготой юм.
